Verea fala do seu futuro político de non acadar a “necesaria” maioría absoluta en 2027

O presidente do PP compostelán defende a construción de máis vivenda, unha rede de cociñas escolares propias, a creación dunha Casa das Familias e programas para a mocidade e as persoas maiores, ao tempo que reivindica o papel da oposición como alternativa de goberno.

O presidente do Partido Popular de Santiago, Borja Verea, aproveitou a súa participación nos micrófonos de Radio Líder Santiago para afondar nalgunhas das propostas que pretende incorporar ao programa co que concorrerá ás eleccións municipais de 2027. A vivenda, as políticas de apoio ás familias, a educación, a atención á adolescencia e a mellora da calidade de vida das persoas maiores centraron boa parte dunha entrevista na que tamén reivindicou o labor da oposición e marcou distancias co actual goberno municipal.

A conversa produciuse poucas horas despois da presentación da Xunta de Galicia do proxecto para construír 34 novas vivendas na zona de Santa Marta. Verea valorou positivamente o anuncio, aínda que criticou a tardanza do Concello na cesión dos terreos necesarios para facer realidade a actuación.

Segundo sinalou, o acceso á vivenda constitúe hoxe o principal reto da cidade. “É a prioridade número un”, asegurou, ao referirse a un problema que, ao seu xuízo, resulta especialmente grave en Santiago debido ao elevado prezo dos alugueiros e da compra de inmobles e á escaseza de oferta dispoñible.

Máis solo para construír e mobilización da vivenda baleira

Entre as medidas que defende para afrontar esta situación, o líder popular apostou por modificar o Plan Xeral de Ordenación Municipal para facilitar a construción de novas promocións residenciais.

“Santiago ten solo suficiente”, afirmou, argumentando que a cidade dispón de capacidade para crecer urbanisticamente e aumentar a oferta de vivenda.

Verea tamén puxo o foco na importante cantidade de pisos baleiros existentes no municipio. A súa proposta pasa pola creación dunha especie de banco municipal de alugueiro, no que o Concello garantiría o cobro dunha renda aos propietarios a cambio de poñer as súas vivendas a disposición de familias que as necesiten.

A estas iniciativas sumou a transformación de baixos comerciais en vivendas en determinados barrios da cidade, unha medida que considera complementaria para ampliar a oferta residencial.

Especial relevancia concedeu ao futuro desenvolvemento urbanístico de Mallou, que definiu como “a transformación urbanística e de construción de vivenda máis importante dos últimos 30 anos na cidade”, convencido de que marcará “un antes e un despois” para Santiago.

Defensa das cociñas escolares propias

Outro dos asuntos abordados foi o modelo de comedores escolares. O presidente popular reiterou a aposta do seu partido por implantar unha rede de cociñas propias nos centros educativos composteláns.

Verea cuestionou os informes utilizados polo actual executivo para xustificar a inviabilidade da medida e asegurou que existen espazos suficientes para habilitar instalacións adaptadas ás necesidades de cada colexio.

“Claro que caben cociñas pequenas nas escolas”, afirmou, defendendo que os alumnos poidan recibir comida elaborada nos propios centros fronte ao modelo que atribúe ao goberno local, baseado nunha gran cociña central e na distribución posterior dos menús.

Segundo explicou, o PP xa ten identificadas as primeiras actuacións que impulsaría e mesmo cuantificado o seu custo económico.

Unha Casa das Familias pioneira en Galicia

Entre as iniciativas sociais presentadas destaca a creación da denominada Casa das Familias, un proxecto que, segundo explicou, sería pioneiro en Galicia.

A proposta está orientada a ofrecer apoio a familias con fillos adolescentes que afrontan dificultades de convivencia, problemas de comportamento, situacións de acoso escolar, adiccións ou outras circunstancias que afectan á vida familiar.

“Sería un centro referencial onde as familias acudirían cos seus problemas”, explicou.

O proxecto contempla a presenza de entre catro e cinco profesionais especializados en diferentes ámbitos e pretende converterse nun espazo de orientación, prevención e acompañamento para evitar que determinadas situacións evolucionen cara a escenarios máis complexos.

Verea incidiu tamén na necesidade de ofrecer alternativas de ocio e aproveitamento do tempo libre para a mocidade compostelá.

Tres semanas en Irlanda para o alumnado de terceiro da ESO

Unha das propostas máis chamativas da entrevista foi a relacionada coa educación e o aprendizaxe de idiomas.

O líder popular comprometeuse a impulsar un programa de inmersión lingüística en Irlanda destinado ao alumnado de terceiro da ESO da cidade.

“Todos os alumnos de terceiro da ESO de Santiago que o desexen poderán disfrutar dun programa de inmersión lingüística de tres semanas en Irlanda”, afirmou.

Segundo detallou, as familias con maior capacidade económica realizarían unha achega parcial ao financiamento do programa, mentres que o Concello asumiría os custos necesarios para garantir a igualdade de oportunidades.

“Ningún rapaz de Santiago quedará fóra deste programa por cuestións económicas”, subliñou.

Novas medidas para as persoas maiores

Verea avanzou tamén que o seguinte bloque de propostas que presentará nos próximos meses estará centrado nas persoas maiores.

Ao seu xuízo, os veciños de máis idade merecen unha atención específica e máis recursos que lles permitan gozar dunha mellor calidade de vida.

“Teñen todo o dereito de desfrutar da súa cidade nas mellores condicións”, sostivo, anunciando a chegada de medidas “transformadoras” dirixidas exclusivamente a este colectivo.

“Hai unha alternativa de goberno”

Durante a entrevista, o presidente do PP compostelán reivindicou o papel que desempeña como líder da oposición municipal. Segundo explicou, o seu traballo baséase en dúas grandes liñas: fiscalizar a acción do executivo local e presentar unha alternativa política para a cidade.

“Hai unha alternativa de goberno, hai unha maneira de entender a cidade diferente”, afirmou.

Neste sentido, rexeitou as acusacións de alarmismo que recibe por parte dos seus adversarios políticos cando denuncia cuestións relacionadas coa seguridade, a limpeza urbana ou o funcionamento do transporte público.

“Quero que a cidade estea máis limpa que nunca”, asegurou, defendendo que sinalar os problemas forma parte da súa responsabilidade como representante da oposición.

A maioría absoluta, condición indispensable para gobernar

Borja Verea recoñeceu no tramo final da entrevista que o seu gran obxectivo é acadar a maioría absoluta nas eleccións municipais de 2027, unha condición que considera imprescindible para chegar á Alcaldía de Santiago. O líder popular asegurou que precisa arredor do 45 % dos votos para gobernar e insistiu en que toda a súa estratexia política está centrada en convencer á cidadanía de que representa unha alternativa real ao actual executivo local.

Preguntado sobre o seu futuro político no caso de non conseguir ese respaldo maioritario, Verea admitiu que se abriría unha nova etapa na que habería que tomar decisións. Con todo, restou importancia a esa hipótese e subliñou que neste momento non dedica esforzos a pensar no que sucederá despois das eleccións, senón exclusivamente en lograr o mellor resultado posible para o seu partido.

O presidente do PP compostelán considera que os comicios de 2027 serán unha oportunidade decisiva para o cambio político na cidade. Ao seu xuízo, os santiagueses coñecen xa perfectamente as posicións dos distintos partidos e as posibles alianzas de goberno, polo que apelou á confianza no seu equipo para abrir unha nova etapa en Santiago. “Confiar en min e no meu equipo é darlle unha oportunidade ao cambio”, concluíu.