Derrotismo alegre e punk noventeiro, así soa Noite Atari: “En Galicia hai bandas a patadas, faltan escenarios”

• A banda gañadora da quinta convocatoria de Onda Chicha repasa en Radio Líder Santiago a súa traxectoria, influencias e unha visión crítica da escena musical galega actual

A banda galega Noite Atari, gañadora da quinta convocatoria do concurso Onda Chicha, pasou polos micrófonos de Radio Líder Santiago nunha entrevista marcada pola naturalidade, o humor e unha mirada crítica sobre a realidade da música en Galicia. O grupo, formado por Dani, Miguel e Álex —coa ausencia de Nano por motivos laborais—, compartiu a súa evolución desde os seus inicios ata o momento actual, no que comezan a consolidar un proxecto musical con identidade propia.

“Nacemos no 2019 e retomamos despois da pandemia con moitas cancións acumuladas”, explicaron, destacando como ese período foi clave para definir o seu son. Cunha clara influencia do punk rock dos anos noventa, recoñecen sen complexos as súas raíces: “Sonamos a esa ola que mamamos de mozos, de California e San Diego, e quedamos aí”. Un estilo que, segundo eles mesmos admiten, non buscan transformar deliberadamente: “Admiro moito á xente que cambia de son, pero non sei como se fai”.

O nome da banda tamén revela esa conexión coa nostalxia: “Noite Atari vén dunha noite xogando á consola con cinco anos, a primeira gran trasnochada”. Un espírito que, segundo confesan, conecta coa súa filosofía vital: “Somos unha banda de Peter Panes, non queremos madurar”.

Unha xeración entre a retranca e a frustración

Noite Atari define as súas letras como unha mestura de ironía e realidade xeracional. “Somos moi felices no escenario, pero nas letras non hai moito que celebrar”, sinalan. A banda introduce o concepto de “derrotismo alegre” para describir o seu discurso: “Somos a xeración mellor preparada, pero tamén a que levou golpes por todos lados”.

Aínda que non se consideran unha banda explicitamente política, recoñecen que o contexto social inflúe na súa música: “Non levamos bandeiras, pero contamos como nos afectan certas políticas e estafas que seguimos sufrindo”. A retranca galega está presente como ferramenta expresiva: “Facemos música con retranca, moi galega”.

Unha escena viva pero con carencias estruturais

Durante a entrevista, o grupo fixo unha análise crítica da situación musical en Galicia. A pesar de recoñecer a gran cantidade de bandas emerxentes —“hai bandas a patadas”—, denuncian a falta de apoio: “Faltan escenarios, faltan locais de ensaio e apoio institucional” .

Tamén puxeron o foco nas dificultades para tocar en directo: “Non podes pretender que unha banda que paga ensaio e instrumentos toque por nada” . Ademais, sinalan unha tendencia cara ao mainstream no público: “Antes había máis ganas de descubrir bandas novas, agora imos máis ao que xa está establecido”.

No ámbito dos festivais, amosáronse críticos coa falta de coherencia nos carteis: “Mesturar estilos sen criterio responde máis ao diñeiro que á música”. Reclaman unha maior especialización: “Non é cuestión de ser rancios, pero os festivais deberían ter unha identidade”.

Comunidade, amizade e música

A banda tamén destacou a importancia de crear comunidade dentro da escena galega. “Imos coñecendo bandas, facendo amigos e colaborando entre nós”, explican, mencionando grupos cos que compartiron experiencias e escenario.

No plano creativo, Noite Atari aposta pola autenticidade e pola conexión co público. O seu tema “Insectos”, presentado na entrevista, representa unha vertente máis directa: “É unha canción na que deixamos as metáforas e dicimos as cousas claras”.

Chamamento ao público: apoiar o local

A entrevista rematou cunha mensaxe clara á cidadanía: “Hai que apoiar as bandas locais, ir aos concertos e descubrir o que temos preto” . Unha reivindicación que conecta co espírito do propio concurso Onda Chicha, que busca dar visibilidade ao talento emerxente.

“Todos os grandes artistas foron algunha vez bandas locais”, lembran, facendo un chamamento a valorar e coidar a escena musical de base.