A Estrada alcanza os 20.103 habitantes segundo o INE mentres que o padrón sinala 20.222

• Existe unha discrepancia de 119 habitantes entre a cifra do padrón municipal e a comunicada polo INE, unha “diferenza habitual” ante a que a administración estradense está en proceso de alegación.
• O dato que baralla o Concello é de 20.222 veciños, polo que a diferenza será agora analizada en profundidade para confrontar rigorosamente os datos antes do peche definitivo do censo oficial.
• Os cambios de domicilio continúan sendo a principal razón tanto para as altas como para as baixas, sendo A Estrada un concello con elevada mobilidade residencial.

A Estrada, 21 de marzo de 2025.- O departamento municipal de Reto Demográfico analizou hoxe os datos que o Instituto Nacional de Estatística (INE) fixo chegar ao Concello da Estrada, os últimos oficiais en número de habitantes que baralla para este municipio pontevedrés. Dende a concellaría que dirixe Manuel Magariños detallouse que o INE totaliza 20.103 veciños, namentres que a poboación rexistrada polo Concello, tras a depuración do padrón de 2024, ascende a 20.222.

Existe, polo tanto, unha discrepancia de 119 habitantes entre o padrón estradense e a cifra comunicada polo INE, situación que suscita que agora sexa a administración municipal a que exercite a quenda de alegacións. “Esta diferenza é habitual en procesos de revisión anual e require unha análise específica antes do peche definitivo do censo oficial”, indicou Magariños. Explicou que o Concello está agora en proceso de confrontación de datos ante o INE para clarificar a diferenza constatada e asegurar a precisión das cifras oficiais definitivas.

Tras depurar o padrón do exercicio 2024, o padrón do Concello da Estrada tiña rexistrada unha poboación de 20.222 veciños, a razón de 9.742 homes (48,18%) e 10.480 mulleres (51,82%). Tendo en conta que o dato oficial aportado polo INE resta 119 persoas a este reconto demográfico, a administración local ten agora ata o próximo 9 de abril para validar ou corrixir a cifra proporcionada polo instituto estatal mediante a presentación das actas correspondentes.

Dende Reto Demográfico aportouse hoxe unha análise da dinámica poboacional rexistrada no municipio estradense no período 2023-2024. Segundo os datos que constan no Concello, tras un saldo positivo de 52 persoas en 2023, o exercicio 2024 deixou 740 altas e 745 baixas, cunha diferenza de só 5 persoas que amosa unha tendencia bastante equilibrada. De feito, en 2023 contabilizáronse na Estrada un total de 103 nacementos e 268 falecementos, mentres que en 2024 foron 101 as incorporacións ao padrón por nacementos e 267 as baixas por defuncións. Os datos evidencian cifras moi parellas.

Moita mobilidade

Ao fío disto, a análise cualitativa da dinámica demográfica amosa unha mobilidade residencial que continúa sendo o principal factor diferencial para as altas e as baixas, superando o 80% dos casos no tocante ás altas no censo. Isto tradúcese en que A Estrada é un municipio cunha elevada mobilidade. Máis polo miúdo, en 2024 o censo municipal rexistrou 625 altas (o 84,5% do total) de persoas que cambiaron a súa residencia e se afincaron no municipio estradense.

Outro elemento clave é o saldo vexetativo negativo, superando o número de falecementos amplamente os nacementos. Porén, a dinámica negativa no crecemento natural da poboación está moi lonxe de seren un fenómeno local, encadrándose A Estrada nunha tendencia xeralizada.

En conclusión, dende o citado departamento municipal asúmese que o Concello da Estrada afronta retos claros derivados da tendencia ao envellecemento e dunha leve pero persistente tendencia ao despoboamento. “A poboación feminina mostra maior vulnerabilidade á emigración no último ano analizado”, explica Magariños, sinalando que en 2024 o saldo de mulleres foi especialmente negativo (-25), fronte ao saldo positivo de varóns (+20).

Agora, Reto Demográfico centrarse en presentar “alegacións rigorosas” antes do vindeiro 9 de abril ante o Instituto Nacional de Estatística para garantir que a cifra oficial final atope correspondencia coa realidade municipal.