Falece un mozo motorista tras unha colisión no Ensanche de Santiago

Foto: Salseo USC

Un tráxico accidente de tráfico sacudiu a noite deste domingo en Santiago de Compostela, onde un mozo motorista perdeu a vida tras sufrir un forte impacto nunha colisión con outra motocicleta.

O sinistro tivo lugar arredor das 23:00 horas na intersección das rúas Alfredo Brañas e República de El Salvador, no corazón do Ensanche compostelán. De inmediato, os servizos de emerxencia desprazáronse ata o lugar para atender os implicados.

Debido á gravidade das feridas, o mozo foi trasladado de urxencia ao Hospital Clínico Universitario de Santiago (CHUS), onde os equipos médicos fixeron todo o posible por salvarlle a vida. Porén, a pesar das longas horas de intervención cirúrxica, o motorista non logrou superar un severo traumatismo torácico e acabou falecendo.