Guadi Galego regresa a Santiago con dous concertos íntimos na Sala Riquela

Guadi Galego regresará aos escenarios de Santiago de Compostela os días 3 e 4 de decembro cunha proposta especialmente íntima baixo o título Oníricos e outros delirios. A artista galega actuará na Sala Riquela, onde ofrecerá dous concertos en formato trío pensados para recuperar a proximidade e a conexión directa co público.

Neste novo directo, Guadi Galego interpretará temas de Pélago. Contos oníricos, o seu último traballo discográfico, xunto con algunhas das cancións máis destacadas da súa traxectoria e outras pezas que ata o momento nunca levou ao escenario. A proposta nace da vontade da cantante de reivindicar a música en directo como un espazo de encontro, emoción e escoita, afastado das dinámicas de consumo rápido.

Para estes concertos estará acompañada por Vic Moliner, responsable tamén da produción dalgunhas das súas últimas músicas, e por Iago Carro. O piano de Guadi, o baixo e os sintetizadores de Moliner e a batería de Carro conformarán a base dun espectáculo concibido para achegar o público ao propio proceso creativo das cancións e á súa esencia máis directa.

Santiago ocupa, ademais, un lugar especial na vida e na carreira de Guadi Galego, que considera a cidade parte da súa casa. A elección dunha sala de pequeno formato como Riquela reforza así o carácter próximo dunha proposta coa que a artista busca eliminar artificios e recuperar a relación máis esencial entre intérpretes, cancións e público.

Os concertos de Oníricos e outros delirios en Santiago celebraranse o xoves 3 e o venres 4 de decembro na Sala Riquela. As entradas, cun prezo de 20 euros máis gastos de xestión, sairán á venda o venres 2 de outubro ás 12.00 horas a través de Enterticket.