Leimanis, nova baixa por lesión no Monbus Obradoiro

Nos adestramentos da selección letoa durante a ventá FIBA do mes de novembro, o xogador Toms Leimanis sufriu unha fractura na súa boneca esquerda.

Desde o Monbus Obradoiro están á espera de reunir toda a información posible por parte da selección de Letonia para que os servizos médicos do clube compostelán poidan definir o alcance da lesión e os períodos de recuperación.

Doutra banda xa se coñecen os enfrontamentos dos cuartos de final da Copa España de baloncesto, que se disputarán o día previo ao comezo das festividades de Nadal e o día posterior á súa finalización. O Monbus Obradoiro visitará o 23 de decembro ao UEMC Real Valladolid e xogará a volta o 7 de xaneiro no Multiusos Fontes do Sar.

O técnico do Monbus Obradoiro analiza e opina que «calquera equipo que nos tocase sería un rival difícil. Os equipos que quedamos temos todos un nivel alto. Xa xogamos en Valladolid e foi un partido que nos custou moitísimo gañar. Será un enfrontamento moi duro. Tanto a liga como os equipos estamos progresando e, por iso, non podemos tomar como modelo aquel enfrontamento previo, aínda que coñecérmonos pode axudarnos un pouco. Ademais, paréceme que xogar o 7 de xaneiro no noso pavillón coa nosa afección é algo moi positivo».

Xa se coñece tamén o posible cadro no caso de que o equipo consiga o pase ás semifinais da Final Four, que se disputará o sábado 24 e o domingo 25 de xaneiro, respectivamente. O sorteo deparou que o noso posible rival sexa o gañador do enfrontamento entre o Real Betis e o Alimerka Oviedo.