Localizado con vida o octoxenario perdido en A Estrada

Os axentes da Garda Civil atopárono en bo estado nunha pista forestal tras un amplo dispositivo de busca no que colaboraron os drons da Axega e que se dilatou durante a madrugada.

O home saíra co seu coche a dar un paseo cando se desorientou e acabou perdido nunha pista forestal. De feito, foi o seu afillado quen alertou ao 112 Galicia pasadas as 18:30 horas para sinalar que recibira unha chamada do implicado, desorientado. O seu terminal estaba vinculado a un teléfono fixo e non tiña posibilidade de localización, pero si que mantivo contacto cos xestores do 112 Galicia.

No operativo de busca, que se prolongou durante a madrugada e que estivo coordinado pola Garda Civil, tamén participaron Urxencias Sanitarias de Galicia-061, a Unidade Operativa de Drons da Axega, o GES e o Servizo Municipal de Protección Civil da Estrada e a Policía Local.

Foron os propios axentes da Garda Civil os que localizaron ao home nunha pista forestal ao fío das 4:30 horas. Foi finalmente trasladado nun vehículo todoterreo da Axencia Galega de Emerxencias ata o centro de saúde da Estrada, onde se lle prestou asistencia sanitaria.