Medalla de Ouro da Orde da Cámara de Comercio de España, a título póstumo, a D. José Sierra Fernández

Santiago de Compostela, 18 de outubro de 2024. A sede de Afundación (Rúa do Villar, 19) acolleu esta mañá, o acto de entrega da Medalla de Ouro da Orde da Cámara de Comercio de España, a título póstumo, a D. José Sierra Fernández.

O acto contou coa presenza da Presidenta da Cámara de Comercio de Santiago, María Pais Fajín; a Deputada de Industria, Emprego, Política Demográfica e Medio Ambiente da Deputación da Coruña, Rosa Ana García López; a Conselleira de Economía e Industria, María Jesús Lorenzana Somoza; e a Alcaldesa de Santiago de Compostela, Goretti Sanmartín Rei. Justo Sierra, actual Presidente de UROVESA, estivo arroupado pola súa familia neste acto; a presidenta da Cámara de Comercio de Santiago quixo referirse a eles no seu discurso “no ano 2016 asumía o legado de UROVESA o seu fillo Justo, do que sentía profundamente orgulloso. O mesmo cabería dicir das súas fillas Cecilia e Cristina e da súa muller, Mercedes, fiel compañeira, polas que sentía profunda devoción. UROVESA, xunto coa súa familia, foron os grandes piares da súa vida”.

Justo Sierra, lembrou do seu pai, o Sr. Sierra: “transmitiunos o importante que é ser unha persoa de valor e non unha persoa de éxito, o éxito é a  consecuencia do valor. Na súa vida, sempre buscou, adquirir, potenciar e transmitir os valores, sempre causou un impacto positivo entre todas as persoas que coñecía”. Afirmou que a iniciativa e a actitude emprendedora foron os valores que o empuxaron a tomar as rendas da Cámara.

Por último Justo Sierra quixo recalcar outras dúas das virtudes do seu pai: “a confianza nas persoas era clave para calquera proxecto, como no seu momento tomar as rendas da Cámara; e a xenerosidade, dedicou a súa vida aos demais, á súa familia, aos seus empregados, á súa contorna, e nun momento da súa vida, tamén á Cámara de Comercio de Santiago”.

A presidenta da Cámara de Comercio de Santiago, María Pais, agradeceu á Cámara de Comercio de España e ao seu Presidente, José Luis Bonet, a excelente disposición con que acolleu a demanda do Pleno da Cámara compostelá, para a concesión da medalla de ouro a D. José Sierra: “unha condecoración nútrese e engrandece co prestixio que lle dan os seus galardoados e hoxe, a medalla de ouro da institución cameral, alcanzou, sen dúbida, o seu máximo nivel de excelencia”.

A deputada provincial, Rosa Ana García, destacou do Sr Sierra: “ser un galego exemplar e un referente empresarial de Santiago e de toda Galicia. Visionario dos negocios, adaptou a súa empresa aos tempos. É un referente para unha xeración de empresarios e emprendedores galegos. É o claro exemplo da nosa idiosincrasia: a empresa familiar, base do noso tecido empresarial”.

Pola súa banda, a Conselleira de Economía e Industria, Mª Jesús Lorenzana, manifestou: “é un orgullo que siga habendo estes recoñecementos a décadas de traballo no mundo internacional. Esta Medalla de Ouro é un premio á audacia, o empeño e a intelixencia de empresarios, como o Sr. Sierra”.

O presidente de Cámara España, José Luis Bonet, manifestou: “ que o acto de hoxe é unha mostra de agradecemento á valiosa achega do Sr. Sierra a todo o sistema cameral, que co seu traballo desde Santiago de Compostela contribuíu a engrandecer, e moi particularmente aos seus esforzos a favor do desenvolvemento e a competitividade das empresas santiaguesas”.

Pechou o acto, a alcaldesa do Concello de Santiago, Goretti Sanmartín, quixo ter unhas palabras emotivas para a familia: “é complicado estar nun acto como este, pero a familia tedes que quedarvos co mellor porque é un orgullo e unha sorte poder nacer nesta familia”.

A alcaldesa quixo lembrar que o Sr. Sierra foi: “un veciño destacado, que foi compostelán por vontade propia e conseguiu facer crecer o tecido empresarial de Santiago. É unha persoa que contribúe a facer cidade, esa Compostela, que todos queremos. Un camiño empresarial exitoso, pero o sinal especial faia a súa persoa solidaria e o seu compromiso cívico e social que tamén transmitiu aos seus fillos: Xusto, Cecilia e Cristina”.

Traxectoria cameral de D. José Sierra Fernández

O Sr. Sierra chegou á Presidencia da Cámara de Comercio de Santiago no ano 2018. Nunha época na que a sustentabilidade e viabilidade da Cámara compostelá non estaba garantida tras varios anos de perdas continuadas que ameazaban seriamente a continuidade da Institución. Quizais non era o momento máis idóneo para asumir a Presidencia, sendo coñecedor da necesidade de adoptar decisións difíciles, pero aínda así, decidiu que era precisamente o momento de devolver á Cámara a axuda prestada nos seus inicios empresariais e dar un paso á fronte liderando unha candidatura conformada polos grandes empresarios da demarcación cameral, quen co seu esforzo, coñecemento e tamén, xenerosidade, foron capaces de “dar a volta á Cámara”, afianzando a súa sustentabilidade.

Cabe destacar a loita do Sr. Sierra por posicionar a Cámara, como un referente na prestación de servizos ao tecido produtivo da súa demarcación territorial e para o seu recoñecemento como brazo extensivo da administración local e autonómica na posta en marcha de proxectos de diferente natureza e enorme calado a favor do tecido empresarial e o conxunto da sociedade e, en definitiva, a súa inestimable contribución ao sistema cameral.

A defensa das Cámaras de Comercio, particularizada na Cámara de Santiago, proviña da súa gratitude polo apoio recibido da entidade cameral nos primeiros pasos da internacionalización de UROVESA.