Nove axencias de viaxes e touroperadores estatais coñecen o potencial turístico de Arzúa

Profesionais do sector participaron nun fam trip organizado pola Deputación da Coruña en colaboración coa Concellería de Turismo, co obxectivo de coñecer o municipio e reforzar a súa proxección como destino

Arzúa, 20 de setembro de 2025.- Arzúa foi hoxe escenario dun fam trip —unha viaxe de familiarización dirixida a profesionais do sector turístico— no que participaron representantes de nove axencias de viaxes e touroperadores estatais. A iniciativa, organizada pola Deputación da Coruña coa colaboración da Concellería de Turismo de Arzúa, puxo o foco en dar a coñecer a riqueza patrimonial, gastronómica, cultural e paisaxística do municipio como destino turístico de referencia.

A xornada en Arzúa incluíu unha visita guiada polo casco urbano, o Enredo do Abelleiro, a Queixería Verbas e a Casa Rural A Curiscada. O día completouse cun xantar no restaurante Pecar, que permitiu descubrir a oferta gastronómica do municipio.

A concelleira de Turismo, Begoña Balado, subliñou a relevancia da iniciativa: “Este fam trip supón unha oportunidade única para que touroperadores e axencias de viaxes coñezan de primeira man todo o que Arzúa pode ofrecer. Queremos que leven unha imaxe completa do noso patrimonio, da nosa gastronomía e da hospitalidade que nos caracteriza, para que iso se traduza en novos visitantes e en máis proxección para o noso concello. Desde a Concellería de Turismo apostamos por posicionar Arzúa como un destino integral, máis alá do Camiño de Santiago, salientando a riqueza natural, o noso legado cultural e a calidade dos produtos locais. Queremos reforzar tamén a nosa imaxe como destino verde, atraer visitantes durante todo o ano e xerar novas oportunidades económicas para a hostalería, o comercio e o conxunto do sector turístico arzuá.”

No fam trip participaron profesionais de Geoland Vacaciones, Pol Viatges, Abacco International, Letango Tours, Hidden Corners of Spain, El Generador, Halcón Viajes, Viajeron e Civitatis, compañías con capacidade de comercializar o destino Arzúa en distintos mercados.