O alcalde de Boqueixón anuncia unha forte inversión en infraestruturas municipais

Álvaro Veiga e Ovidio Rodeiro no photocall da emisora

O alcalde de Boqueixón, Ovidio Rodeiro, participou este mércores nunha entrevista en Radio Líder Santiago onde avanzou parte da axenda cultural e de investimentos do Concello, con especial protagonismo para o Pico de Maio, a festa tradicional que se celebra no Pico Sacro, «a montaña máis simbólica de Galicia», segundo palabras do propio rexedor.

«Xa o dicía Castelao no seu último discurso en Bos Aires: o Pico Sacro é o altar de Galicia», lembrou Rodeiro, reivindicando o valor cultural e paisaxístico deste espazo. «É o mellor miradoiro que ten Compostela, un faro para os peregrinos», engadiu.

A celebración do Pico de Maio, que terá lugar este domingo, incluirá misas, actuacións de gaiteiros locais, gastronomía tradicional e unha visita guiada organizada pola empresa Geotour. «A visita leva por título Viaxe ao Orixe do Pico Sacro, estará conducida polo experto Joaquín Ovial e será ás 12:30h», explicou o alcalde. As persoas interesadas poden inscribirse a través do teléfono do Concello.

Durante a entrevista, Rodeiro fixo tamén un repaso das obras públicas en execución, que suman varios millóns de euros en investimentos:

• Renovación integral do alumeado público: 2.800 farolas pasarán a tecnoloxía LED antes do verán, cun custo de 1,6 millóns de euros.

• Rede de sendas peonís por parroquias como Ponte Ledesma, Campo Rapado ou Sergude, cun orzamento superior aos 2 millóns.

• Plan de saneamento: «Temos un proxecto de 1.280.000 euros para completar a rede e outro de 1.880.000 euros para instalar fosas en 20 aldeas». O obxectivo é «chegar ao 100% das aldeas con acceso a saneamento».

• Renovación da Escola Unitaria de Sergude, construída en 1958, cun investimento de 150.000 euros.

• Proxecto de mellora do ximnasio do Forte, por 200.000 euros, pendente de financiación.

«Temos o 100% de cobertura de auga nas casas, agora queremos o 100% de saneamento nas aldeas», afirmou Rodeiro.

O alcalde tamén fixo referencia ao certame literario Xosé Neira Vilas, centrado este ano na temática do medio ambiente: «Queremos que os nenos reflexionen sobre a reciclaxe, a natureza, o coidado do noso entorno».

Para rematar, destacou a boa acollida da última edición da Carreira das Letras, que uniu simbolicamente o Pico Sacro coa Cidade da Cultura: «Buscamos unir dous faros do noso patrimonio nun mesmo evento cultural».