O Barrio de San Pedro denuncia a falta de apoio municipal ás súas festas populares

• A Asociación Cultural do Barrio de San Pedro reivindica o papel das festas populares na construción de comunidade e denuncia a falta de resposta municipal aos problemas de infraestrutura que arrastran desde 2015

As Festas do Barrio de San Pedro, unha das citas populares máis consolidadas da cidade, volverán celebrarse entre os días 25 e 28 de xuño de 2026. Coincidindo coa preparación dunha nova edición, a Asociación Cultural do Barrio de San Pedro fixo público un comunicado no que reivindica o valor social e comunitario do evento e reclama ao Concello unha solución estable para os problemas de subministración eléctrica que afectan á organización desde hai máis dunha década.

A entidade lembra que leva máis de vinte anos organizando unhas festas que nacen da implicación veciñal e do traballo voluntario. Segundo sinalan, a celebración converteuse nun espazo de encontro interxeracional e nunha ferramenta para fortalecer os vínculos comunitarios nun barrio que, como outros da cidade histórica, afronta procesos de xentrificación, aumento dos prezos da vivenda e perda progresiva de poboación residente.

«Todes adicamos o noso tempo de maneira altruista para construír un barrio vivo e diverso», recolle o comunicado, no que tamén destacan a participación de colectivos sociais, entidades culturais, hostalaría e comercio de proximidade na organización das actividades.

Un problema pendente desde 2015

O principal motivo da reivindicación actual é a situación dos puntos de luz necesarios para o desenvolvemento das festas. A asociación lembra que xa en 2015 denunciara publicamente a retirada do subministro eléctrico municipal e reclamara alternativas seguras para garantir a celebración dos eventos.

Máis de dez anos despois, aseguran que continúan sen existir solucións definitivas. Durante este tempo, afirman ter asumido custos adicionais e buscado solucións provisionais para manter vivo un proxecto que consideran fundamental para a vida comunitaria do barrio.

No comunicado expresan a súa sorpresa por que «despois de tantos anos, aínda non existe unha solución estable para algo tan básico como os puntos de luz necesarios para realizar unhas festas».

As festas como resposta á xentrificación

A organización enmarca esta demanda nun contexto máis amplo de transformación urbana. Segundo explican, as Festas do Barrio de San Pedro non son só unha celebración cultural, senón tamén unha resposta colectiva aos efectos da turistificación, a proliferación de pisos turísticos e as dificultades para acceder a unha vivenda digna.

Entre os obxectivos da edición de 2026 figura precisamente visibilizar estas problemáticas mediante actividades culturais, educativas e reivindicativas, ademais de favorecer o encontro veciñal e o fortalecemento do tecido asociativo do barrio.

A asociación defende que as festas populares constitúen «unha ferramenta fundamental para facer barrio», especialmente nun momento no que consideran que resulta cada vez máis difícil manter a vida comunitaria nos centros urbanos.

Campaña de financiamento para 2026

De cara á próxima edición, a entidade puxo en marcha unha campaña de micromecenado destinada a recadar fondos para sufragar os gastos de organización. A iniciativa busca implicar tanto á veciñanza como ás persoas que, aínda non residindo no barrio, manteñen vínculos co proxecto.

A Asociación Cultural do Barrio de San Pedro, integrada por arredor de 15 persoas organizadoras e máis dun cento de voluntarias e voluntarios, conta cunha longa traxectoria na dinamización sociocultural do barrio. Ademais das festas, promove ao longo do ano actividades como o Movidote Científico, a Paella de Barrio Antifascista ou as Liadas Pardas.

En 2025, o colectivo foi recoñecido co Premio Martín Códax da Música, un galardón que, segundo a organización, supuxo un recoñecemento ao traballo comunitario desenvolvido durante máis de dúas décadas.

Mentres agardan unha resposta das administracións, as persoas organizadoras aseguran que continuarán facendo o que levan anos construíndo: «inventar maneiras de atoparnos, seguir tecendo redes, coidarnos e facer da rúa un lugar onde sentirnos na casa».