O Desfile de Entroido de Padrón contará con preto de 1.500 participantes

O Concello de Padrón reaxusta o calendario de festas debido ao mal tempo e ultima os detalles para a celebración da Pascua. A edil de Festas e Turismo, Chus Campos, destaca o impacto positivo da promoción turística e a aposta pola seguridade nos eventos.

O desfile de Entroido de Padrón, que contaba cunha participación récord de preto de 1.500 persoas, terá que agardar unha semana máis. A previsión de choiva obrigou ao Concello a tomar a decisión de aprazalo ao sábado 15 de marzo. «Non podíamos arriscar sabendo que temos 1.431 persoas anotadas», explicou Chus Campos. Mantense o mesmo horario, ás 17:00 horas, e o mesmo percorrido, desde a zona do Grilo ata as Lágrimas.

A programación inclúe tamén a festa Open Air, que contará con dous DJs e acompañará o desfile. «É unha asociación de rapaces e rapazas de Padrón que xa fixeron eventos importantes e que queríamos apoiar», sinalou a edil.

A celebración da Pascua, que arrinca o 19 de abril, está xa practicamente pechada. «Está todo artellado, algún fleco quedará, pero está todo organizado», comentou Campos. A música volverá ser un dos grandes atractivos, cun cartel no que «estarán as mellores orquestras de Galicia», ademais de grupos de distintos estilos como pop, rock e folk.

A edil tamén destacou a importancia da seguridade durante a festividade: «Son miles de persoas as que chegan a Padrón nestes días, polo que hai que ter todo ben preparado para que non pase nada. E se pasa, que saibamos reaccionar».

No ámbito turístico, Campos valorou moi positivamente os resultados da promoción en Fitur, que inclúe un novo irmandamento con Arjonilla (Xaén), a vila onde faleceu Macías o Namorado. Membros do goberno local desa localidade estarán presentes na feira medieval de Padrón.

Vandalismo no Paseo da Constitución

A entrevista tamén abordou o recente cambio de nome do Paseo da Desembocadura, agora denominado Paseo da Constitución. Poucos días despois da súa inauguración, este enclave sufriu actos vandálicos: «Tres días despois, a bandeira apareceu cortada e o preámbulo da Constitución, que estaba gravado en pedra, apareceu con pintadas», relatou Campos.

A edil lamentou os feitos e confirmou que se repoñerán os elementos danados: «Non imos botarnos atrás ante a idea que temos de convivencia. Queremos que todo o mundo poida pasear e sentirse incluído no noso pobo». Sobre as críticas do BNG, Campos limitouse a dicir que «cada grupo político pode tomar as súas decisións», pero que a maioría da cidadanía rexeitou os actos vandálicos.

Nova relacionada:

Preocupación no CIM de Padrón: «A xuventude normaliza condutas de control que criamos superadas»

Tes a entrevista completa no seguinte enlace.