O III Torneo Solidario Interparroquial recada 10.329€ para a ASANOG

O III Torneo Solidario Interparroquial celebrado o pasado 28 de xuño en Vista Alegre recada 10.329 euros para ASANOG, a Asociación de Cáncer Infantil e Xuvenil de Galicia. O alcalde, José Ramón Romero, participou xunto con Marga Hermo, Lara Buig e Chuco Otero e outros membros da organización na entrega do cheque simbólico que recolleu Vanessa Vidueiros por parte da asociación.

Marga Hermo agradeceu, en nome da organización “a colaboración das empresas e comercios que doaron agasallos para os sorteos e tamén de toda a xente de Boiro que se achegou ao partido e gracias á que se puido recadar esta cifra para ASANOG”.

“Esta doazón é unha mostra de compromiso e solidariedade con ASANOG, unha entidade composta por un equipo de profesionais que presta apoio ás familias de nenas e nenos con cancro nas distintas etapas”, recoñeceu Vanessa Vidueiros. ASANOG leva 13 anos prestando apoio económico, psicolóxico e de acompañamento ás familias.

O alcalde, José Ramón Romero, agradeceu a toda a organización “por esta iniciativa solidaria que logrou recadar unha cifra importante destinada a contribuir ao gran traballo que diariamente fai ASANOG”.