O Pan de Leis, entre as 50 mellores panadarías de España

A panadaría compostelá recibiu en Bilbao unha das Estrelas DIR-Informática da Panadaría, que recoñecen aos Panadeir@s TOP de España 2026

Santiago de Compostela, 15 de setembro de 2026. O Pan de Leis vén de ser recoñecida como unha das 50 mellores panadarías de España na Ruta de l@s 50 Panader@s TOP de España 2026, organizada por Pan de Calidad e Panàtics.

A distinción foi entregada este pasado luns, 14 de setembro, en Bilbao, no marco do Bilbao Global Bakery Forum, un encontro que durante dúas xornadas reuniu profesionais, investigadores, empresas e institucións para compartir coñecemento e abordar algúns dos principais retos de presente e futuro da panadaría.

O Pan de Leis recibiu unha das Estrelas DIR-Informática da Panadaría Española, o recoñecemento co que a organización distingue aos Panadeir@s TOP de España e pon en valor o traballo e a calidade da panadaría artesá. Trátase da cuarta Estrela que recibe O Pan de Leis, consolidando así a súa presenza entre os obradoiros recoñecidos a nivel estatal.

Para O Pan de Leis, esta distinción supón un recoñecemento a unha forma de entender o oficio construída ao longo de tres xeracións, pero tamén ao traballo diario dun equipo que mantén esa tradición e a fai evolucionar.

“Recibir este recoñecemento por cuarta vez fainos moita ilusión e, sobre todo, é un recoñecemento ao traballo de todo o equipo. Detrás de cada pan hai moitísimas horas de traballo, esforzo e persoas que cada día intentan facer as cousas un pouco mellor.

Os premios son unha satisfacción e anímannos a seguir mellorando e innovando, pero o verdadeiramente importante é que cada día os nosos clientes leven para a casa un bo pan, saboroso e saudable, e que sigan confiando en nós”, sinala Fernando Leis.

Esta vontade de seguir mellorando e innovando tradúcese tamén en novos proxectos. O Pan de Leis traballa actualmente no desenvolvemento dunha nova liña de pans cun especial foco no seu valor nutricional, que dará a coñecer proximamente e coa que busca seguir ampliando a súa proposta sen perder de vista o sabor, a calidade das materias primas e o coidado dos procesos de elaboración.

Santiago, presente entre os recoñecementos

A edición de 2026 dos Panadeir@s TOP deixou tamén unha destacada presenza galega e, en particular, compostelá. Xunto a O Pan de Leis, Alex Arrieche, de Sabores, recibiu a súa primeira Estrela DIR-Informática, situando así a dous negocios de Santiago entre os recoñecidos nesta edición.

Para O Pan de Leis, trátase ademais dunha alegría especialmente próxima, xa que Arrieche, compañeiro de profesión, formou parte do equipo da panadaría anos atrás, antes de continuar a súa traxectoria profesional co seu propio proxecto en Compostela.

A presenza de ambos os negocios entre os recoñecidos súmase á doutros profesionais e obradoiros galegos nesta edición, poñendo de manifesto o peso e a calidade da panadaría galega no panorama estatal.

Tres xeracións facendo pan

A historia de O Pan de Leis está ligada á tradición panadeira familiar e ao relevo entre xeracións. Tres xeracións dunha mesma familia contribuíron a construír un proxecto que mantén o respecto polo oficio e polos procesos de elaboración ao tempo que continúa evolucionando e incorporando novos coñecementos, produtos e formas de facer pan.

Hoxe, O Pan de Leis mantén esa combinación entre tradición e innovación, coa calidade do produto como eixo central e coa vontade de seguir achegando ás persoas consumidoras pans elaborados coidando as materias primas, os tempos e cada unha das fases do proceso.

A cuarta Estrela DIR-Informática súmase así á traxectoria dunha panadaría compostelá que continúa medrando sen perder de vista aquilo que está na súa orixe: o produto, o oficio e as persoas que cada día confían no seu pan.