O PP reclama unha solución inmediata ao problema das vacas soltas en Corexo

• Nerea Barcia reclama “unha solución inmediata a unha situación que os veciños levan denunciando desde 2023 sen que o goberno municipal fose quen nin sequera de reunirse con eles”.

• “Falamos dun problema que afecta á seguridade e á convivencia da veciñanza e ante o que, despois de tres anos de protestas, o goberno de BNG e CA segue sen dar resposta”, sinalou.

A concelleira do Partido Popular de Santiago, Nerea Barcia, volveu dar voz aos veciños e veciñas de Corexo, que levan desde o ano 2023 protestando pola problemática das vacas soltas na zona sen que, tres anos despois, o goberno municipal fose quen de reunirse con eles para escoitar as súas demandas e buscar unha solución.

Barcia lamentou que, durante todo este tempo, “a veciñanza trasladou en numerosas ocasións a situación que está a sufrir e, lonxe de atopar unha resposta por parte do goberno de BNG e CA, o problema foi agravándose”.

“As vacas -explicou- andan frecuentemente soltas pola estrada, chegando incluso a desprazarse ata concellos limítrofes. Segundo trasladan os veciños, esta situación xa provocou varios accidentes e supón un importante risco tanto para os condutores como para os peóns e a propia veciñanza”.

A concelleira popular considera “incomprensible” que, despois de tres anos de protestas e reclamacións, o goberno municipal non se sentase cos afectados para coñecer directamente o problema. “O mínimo que se lle pode pedir a un goberno é que escoite aos seus veciños, especialmente cando están advertindo reiteradamente dunha situación que pode afectar á súa seguridade”, afirmou.

Barcia remarcou que “a situación chegou ata tal punto que os propios veciños e veciñas se ven obrigados a gardar as vacas durante as noites, co fin de evitar que volvan saír e poidan provocar novos incidentes”.

Tres anos reclamando unha solución

Nerea Barcia reuniuse en varias ocasións cos veciños e veciñas de Corexo para escoitar de primeira man as súas preocupacións, coñecer as dificultades que están a vivir e comprobar persoalmente o que está a acontecer na zona.

“Mentres os veciños levan desde 2023 reclamando unha solución, o goberno municipal leva tres anos sen ser capaz nin sequera de reunirse con eles. Non estamos ante unha situación puntual nin ante unha protesta recente: son tres anos pedindo que alguén os escoite e actúe”, incidiu.

Dende o Partido Popular reclaman ao goberno de BNG e CA que “deixe de mirar para outro lado”, manteña de maneira inmediata unha reunión coa veciñanza e analice a situación na súa totalidade para actuar, dentro das competencias municipais e en coordinación coas administracións e servizos que corresponda.

“Os veciños de Corexo non poden seguir esperando. Levan tres anos advertindo do problema e merecen, como mínimo, ser escoitados polo seu goberno municipal”, concluíu Barcia.