O programa ‘Goza do Ulla’ chega a Arzúa co roteiro da Fervenza das Hortas

Un ano máis chega este programa no que 20 concellos propoñen as súas rutas de sendeirismo arredor do Río Ulla, e nesta ocasión o Concello de Arzúa, a través da Concellería de Turismo, ten o pracer de organizar unha ruta á fermosa Fervenza das Hortas. O sábado, 28 de setembro, poderás participar nesta ruta de sendeirismo que permitirá descubrir un dos paraxes naturais máis fermosos da zona centro de Galicia.

Begoña Balado, concelleira de Turismo e acción Urbana, destaca que a Ruta Lineal da Fervenza das Hortas “é unha oportunidade única para coñecer de preto un dos espazos naturais máis especiais de Arzúa, onde a beleza da paisaxe e a tranquilidade do entorno ofrecen unha experiencia inigualable para os amantes da natureza”.

Ruta lineal: A Ruta da Fervenza das Hortas, situada en Arzúa, é un tesouro natural que ofrece aos visitantes unha experiencia inmersiva no corazón da paisaxe galega. Ideal para os amantes da natureza e a fotografía, a ruta destaca pola súa beleza natural, converténdoa nun destino perfecto para unha xornada de sendeirismo relaxada e enriquecedora. O son constante da auga e a pureza do entorno fan desta ruta unha xoia oculta que capta a esencia virxe do rural galego.

O punto de encontro será na Praza de Galicia ás 9:00h, onde un autobús de balde trasladará aos participantes ata o punto de inicio da ruta, a Capela da Fonte Santa. A actividade terá unha duración aproximada de 5 horas, e ás 14:00h o autobús regresará cos sendeiristas ao punto inicial en Arzúa.

Para inscribirse, é imprescindible reservar praza contactando coa oficina de Turismo de Arzúa no teléfono 981 508 056, en horario de 10:00h a 14:00h e de 15:00h a 18:30h, ou enviando un correo electrónico a turismoarzua@gmail.com.