Os desprendementos no San Clemente evidencian o seu deterioro e a USC reclama unha rehabilitación urxente

Santiago, martes 8 de setembro de 2026. A Universidade de Santiago está a actuar tras producirse o desprendemento puntual de elementos construtivos nunha das fachadas do Colexio Maior San Clemente, na zona orientada cara á Avenida das Ciencias do Campus Sur. O incidente afectou a parte da cornixa e a elementos da cuberta dun dos balcóns. Na caída, algúns destes elementos alcanzaron a cuberta do balcón situado na planta inferior, provocando á súa vez o desprendemento de tellas e doutros elementos de remate.

Ata alí desprazáronse a reitora Rosa Crujeiras; o xerente da USC, Juan Villoslada, e o vicerreitor de Coordinación do Campus de Lugo, con competencias en infraestruturas, Roberto Bande, xunto con outras persoas responsables da institución e o equipo técnico da Oficina de Infraestruturas da USC, que comprobaron o precario estado no que se atopa o edificio. “Levamos moito tempo reclamando financiamento para a rehabilitación deste inmoble -o proxecto está valorado en 5,6 millóns de euros- e as Administracións públicas deberan comprometerse para preservar non só un edificio imprescindible para a comunidade universitaria senón tamén un patrimonio de gran valor histórico e cultural para a cidade”, manifestou Bande.

Desde o momento en que se tivo coñecemento do incidente e en comunicación co Concello compostelán, a Universidade traballa na retirada controlada de todos aqueles elementos que presentan inestabilidade ou que poidan supoñer risco de novos desprendementos, así como no aseguramento provisional das zonas afectadas. Paralelamente, procedeuse a delimitar e valar a zona de actuación co obxectivo de impedir o acceso e garantir as condicións de seguridade mentres se desenvolven estes traballos.

O equipo técnico da Universidade, coa asistencia dos responsables de seguridade, está a realizar o seguimento das actuacións e a adoptar as medidas necesarias para deixar a zona afectada en condicións de seguridade coa maior brevidade posible. Unha vez finalizadas estas actuacións inmediatas, avaliarase o alcance dos danos e as intervencións que resulte necesario acometer.