Os versos de Uxío Novoneyra, Tenório Telles e Moon Chung-Hee incorpóranse ao Xardín das Pedras que Falan

En recoñecemento ao poeta Uxío Novoneyra, a alcaldesa de Santiago puxo en valor no seu discurso a relación entre a chuvia e a literatura: “case se podería escribir unha antoloxía única e exclusivamente con poemas e textos literarios, creados na nosa lingua, dedicados á chuvia” e “se hai un autor na literatura de noso que cantou a chuvia de xeito persistente na súa obra, ese foi sen dúbida Uxío Novoneyra”. Para Goretti Sanmartín, o verso escollido do autor do Courel: Chove pra que eu soñe, «non pode ser máis acaído, porque ademais de ser referencial da súa pegada poética, este verso xa forma parte do noso imaxinario literario».

No caso do poeta brasileiro Tenório Telles, o verso escollido escollido foi Pássaros brancos esgriman com o vento, “que forma parte dun poemario tinxido de cantos existenciais, de anguria polo paso do tempo ou pola inevitabilidade de destino”, explicou a rexedora que se congratulou do «privilexio que é traermos a este recuncho da nosa cidade a Amazonia, pois cos seus versos viaxa a Natureza e a forza deste territorio. Estamos perante unha obra filosófica, transcendente, de procura de significados ocultos. Para iso serve a poesía, para expresar aquilo para o que a linguaxe non literaria non ten palabras».

A terceira pedra gravada recolle o verso da poeta coreana Chung Hee Moon, presente no acto: Son eu o único xeito de encontrarme. Baixo o ceo cheo da pregunta. Gañadora do Premio Cikada, Goretti Sanmartín destacou que a autora coreana “transformou o espazo literario, levando as voces das mulleres a un terreo que tradicionalmente era dominado por escritores masculinos”.

“O Xardín das pedras que falan estase a converter nun lugar de memoria literaria, onde conviven linguas e culturas unidas a través da literatura, e onde a voz das mulleres autoras ten a presenza que lle corresponde, isto é, exactamente a mesma que a dos homes autores. Neste momento hai 8 pedras con versos de mulleres dun total de 17”, destacou a alcaldesa.

En nome da Fundación Uxío Novoneyra, a presidenta da entidade e compañeira de vida do poeta, Elba Rey Martínez, agradeceu esta homenaxe e lembrou que o do Courel situou en Santiago a esperanza de Galicia e afirmou que “a forza do noso amor non pode ser inútil”.

Pola súa parte, a poeta Moon-Chung-Hee manifestou o seu desexo de que “todo o mundo atope poesía” como ela hoxe tivo “este encontro tan fermoso” con esta pedra na que figuran as súas verbas e pronunciou o seu poema para que “resone o seu espíritu” no xardín de Fonseca para sempre, asegurando que non esquecerá este momento na súa vida.