O Concello adxudica por 1,26 millóns as obras da fase III de mellora do Vero Boquete

A Xunta de Goberno Local adxudicou este luns o contrato para as obras do Estadio Municipal Verónica Boquete de San Lázaro á empresa Proyecon Galicia SA, cunha oferta de 1.260.680,85 € (IVE incluído) e un prazo de execución de catro meses.

A voceira do goberno municipal, Míriam Louzao, detallaou que con esta intervención se reparará toda a envolvente do estadio, tanto as fachadas como a cuberta e tamén os soportais. Ademais substituirase o falso teito da zona da cafetería e as carpinterías do muro-cortina da porta 1.

O Estadio Verónica Boquete rematouse de construír en 1993, froito dun convenio entre o Concello, a Xunta de Galiza e o Consello Superior de Deportes. “Estes máis de 30 anos de funcionamento e as deficiencias estruturais que arrastra fixeron necesario elaborar un estudo integral de patoloxías e abordar en fases as reparacións”, lembrou a Míriam Louzao e engadiu que a obra que agora se inicia, correspondente coa fase III, “é a máis importante das realizadas ata o momento”.

O proxecto conta cunha subvención da Deputación Provincial da Coruña de 850.000 euros. O resto dos custos da obra corren por conta do orzamento municipal.