Paula Prado acusa a Goretti Sanmartín de favorecer «a algarada» fronte ás solucións á vivenda

• A secretaria xeral do PPdeG defende en Radio Líder Santiago a construción de vivenda pública fronte á intervención no alugueiro, cuestiona a xestión de Goretti Sanmartín e respalda a Borja Verea como alternativa para a cidade, nunha entrevista na que tamén reclama máis médicos e reivindica o Xacobeo 2027 como unha oportunidade para toda Galicia.

A secretaria xeral do Partido Popular de Galicia, Paula Prado, defendeu en Radio Líder Santiago a construción de vivenda pública como resposta ás dificultades de acceso a un fogar e cuestionou as medidas de intervención no mercado do alugueiro. Nunha entrevista na que tamén abordou a sanidade, a educación e o Xacobeo 2027, a dirixente popular concentrou boa parte das súas críticas no Goberno de Pedro Sánchez e no executivo municipal compostelán. «Para o problema da vivenda o que hai é que construír vivenda», afirmou.

Prado reivindicou o compromiso co que o PPdeG concorreu ás eleccións autonómicas de 2024: duplicar o parque público ata chegar ás 4.000 vivendas nesta lexislatura, que remata en 2028. Segundo asegurou, esas vivendas «xa están en marcha» e algunhas promocións comezaron a entregar as chaves. Como exemplos, citou 74 vivendas en Pontevedra e 24 en Lamas de Abade, en Santiago, onde situou en 480 as previstas nas actuacións ás que se referiu.

A dirixente popular sostivo que as medidas do Goberno central provocan o efecto contrario ao que perseguen, ao retraer a oferta de alugueiro. Tamén vinculou a declaración da Coruña como zona tensionada cunha caída da vivenda dispoñible e augurou consecuencias semellantes en Compostela. Na súa opinión, a falta de seguridade xurídica desanima os propietarios a poñer os inmobles no mercado.

Nesa defensa dos arrendadores, Prado rexeitou que o debate se centre nos grandes tenedores e nos fondos de investimento. «Maioritariamente estamos falando de pequenos propietarios», sinalou, antes de poñer como exemplo persoas que investiron os aforros dunha vida de traballo nun piso para complementar a pensión.

A protesta pola vivenda na praza do Obradoiro deu paso a unha crítica directa á alcaldesa, Goretti Sanmartín. Prado recoñeceu que «as protestas son lexítimas», pero cuestionou o respaldo municipal á acampada e afirmou que recibía subministración eléctrica desde o Concello. Tamén reprochou ao goberno local que, segundo relatou, rexeitase a bonificación solicitada pola Xunta para dúas promocións de vivenda pública.

A secretaria xeral do PPdeG interpretou esa decisión como unha mostra de desinterese pola construción de vivenda e acusou a alcaldesa de favorecer a confrontación: «Interésalle a algarada, interésalle o conflito, interésalle a radicalización do problema». Fronte a esa actuación, reivindicou que os populares buscan «solucións reais, efectivas, a problemas reais».

O ton crítico mantívose ao abordar os incidentes que impediron a celebración dun acto de Vox no centro sociocultural de Santa Marta. Prado defendeu o dereito de calquera formación a expresar as súas ideas e cualificou o sucedido como unha práctica «absolutamente antidemocrática». «En democracia hai que respectar as ideas dos demais. Nos gusten ou non nos gusten», declarou. Ademais, responsabilizou o BNG da mobilización contra o acto e acusouno de tentar silenciar outras opcións políticas.

No plano estatal, cuestionou a cohesión dos apoios parlamentarios de Pedro Sánchez e rexeitou definilos como un bloque de esquerda, pola presenza de Junts e do PNV. Tamén criticou a actuación do Goberno central ante a situación migratoria en Ceuta, que describiu como «gravísima», e reclamou medidas. Na súa intervención vinculou esa situación con problemas de inseguridade e reprochou á esquerda a súa resposta.

Sobre a sanidade, Prado combinou unha valoración moi positiva do sistema público co recoñecemento das dificultades para cubrir prazas. «Temos uns magníficos profesionais», destacou, aínda que admitiu que «hai unha tensión na sanidade importante» pola falta de médicos e a remuda xeracional. Pediu ao Goberno de España que permita formar máis facultativos e á ministra de Sanidade que dialogue cos profesionais para resolver a folga, cuxa continuidade vinculou ao aumento das listas de agarda.

En educación, criticou a LOMLOE por considerar que non favorece o esforzo e o mérito, e defendeu as medidas da Xunta para mellorar a comprensión lectora e as matemáticas. Tamén apoiou a regulación da educación dixital e a participación das familias: «Non podemos obviar as pantallas». Ao seu xuízo, cómpre ensinar a utilizar esas ferramentas e protexer os menores dos riscos das redes sociais e de internet.

O Xacobeo 2027 serviu para reivindicar o turismo e a acollida de peregrinos. Prado avanzou actividades culturais, de lecer e concertos, e salientou a dimensión relixiosa do Ano Santo e o traballo coa catedral. «Somos un pobo acolledor», afirmou, ao defender que os beneficios da chegada de visitantes se estenden ao conxunto de Galicia.

Na política municipal, a dirixente popular expresou o seu respaldo a Borja Verea e evitou ofrecer cifras de enquisas sobre unha posible maioría absoluta. «A mellor enquisa sempre é a que fas no día a día na rúa», respondeu. Enumerou problemas de limpeza, autobuses e beirarrúas, e sostivo que o seu equipo está preparado para liderar un cambio: «A única posibilidade de cambio en Santiago é o Partido Popular e Borja Verea».

Preguntada polo seu propio futuro, Prado deixouno en mans do presidente do PPdeG, Alfonso Rueda. «Eu estarei onde o presidente Rueda considere que son máis útil para o proxecto do Partido Popular», asegurou.