Raúl Rodríguez, campión galego de kumite júnior -61 kg

A Escola de Karate Dokkodo regresou este sábado de Ferrol cunha medalla de ouro no Campionato galego cadete e júnior, celebrado no pavillón municipal de Esteiro, nunha competición que reuniu aos mellores deportistas galegos destas categorías.

O gran resultado para Dokkodo chegou da man de Raúl Rodríguez Paulino, que se proclamou campión galego de kumite júnior -61 kg tras completar unha gran competición.

En cadete -52 kg participaron Martín Carballo e Santi Ribas, nunha categoría especialmente esixente pola presenza de varios dos deportistas máis destacados de Galicia.

Martín realizou unha boa competición, enfrontándose a un rival de moito nivel e sumando unha nova experiencia nunha categoría na que continúa progresando.

No caso de Santi Ribas, a súa participación estivo marcada por un combate moi disputado. Dende Dokkodo consideran que o resultado puido ser diferente, xa que varias accións que chegaron claramente ao opoñente non foron puntuadas e, no tramo final do combate, produciuse un agarrón que, segundo a valoración do árbitro central, debía ter suposto unha nova penalización para o rival. Finalmente, a acción non foi sancionada e Santi quedou fóra da competición.

Máis alá do resultado, desde Dokkodo valoran o traballo dos tres deportistas nun campionato desta esixencia e a experiencia acumulada de cara ás próximas citas que xa están aquí. O vindeiro sábado celebraranse as probas de selección para o Campionato de España cadete, júnior e sub-21, polo que Raúl terán unha nova oportunidade para seguir competindo ao máximo nivel.