Rianxo celebra un aumento de poboación tras anos de baixada constante

O Concello de Rianxo vén de confirmar a cifra definitiva de poboación a 1 de xaneiro de 2025 tras a revisión realizada polo Instituto Nacional de Estatística (INE). Logo dos axustes efectuados sobre a proposta inicial, o municipio fixa o seu número de habitantes en 10.758 persoas.

O dato supón un punto de inflexión logo dunha longa etapa de descenso demográfico. Entre o 1 de xaneiro de 2010 e o 1 de xaneiro de 2024, Rianxo perdeu de media máis de 50 veciños e veciñas por ano. Porén, a cifra actual representa un incremento de 10 habitantes, un xiro de tendencia que desde o goberno municipal cualifican como “ilusionante”.

O alcalde destacou que este pequeno pero significativo avance anima ao executivo local a traballar para consolidar este crecemento nos vindeiros anos, reforzando políticas que contribúan a fixar poboación e mellorar a calidade de vida no municipio.

Co novo dato oficial, Rianxo inicia 2025 con renovadas expectativas e coa vista posta en afianzar un crecemento sostido que deixará atrás máis dunha década de retroceso demográfico.