Rianxo impulsa case 800.000 € en obras de mellora dos servizos municipais en varias parroquias

O Concello de Rianxo vén de sacar a licitación dúas novas actuacións destinadas á mellora das redes de abastecemento e saneamento no municipio, cun investimento conxunto de máis de 285.000 euros.

En concreto, unha das obras corresponde á ampliación das redes de abastecemento e saneamento en Villanustre (Asados), cun orzamento de 194.386,50 euros, mentres que a segunda actuación permitirá a ampliación da rede de abastecemento de auga entre Corques e Outeiro (Taragoña), cun investimento de 90.713,70 euros.

Estas intervencións súmanse a outras importantes obras adxudicadas a finais do pasado ano e que está previsto que se inicien proximamente. Entre elas atópanse a segunda fase do proxecto de dotación das redes de abastecemento e saneamento en Vilas (Asados), cun orzamento de 194.386,50 euros, así como a ampliación das redes de abastecemento e saneamento en Meiquiz e Or (Leiro), que contará cun investimento de 208.785,50 euros.

Ademais, executarase a renovación completa do firme do vial de acceso ao Montiño desde a DP-7203, en Taragoña, cun presuposto de 102.952,85 euros, mellorando así a seguridade e o estado dunha vía moi utilizada pola veciñanza.

En total, o Concello de Rianxo mobiliza case 800.000 euros en obras de mellora dos servizos municipais, que se levarán a cabo nos vindeiros meses en diferentes aldeas e parroquias do municipio, reforzando as infraestruturas básicas e contribuíndo a unha mellor calidade de vida da cidadanía.