Tolo listo en San Miguel de Sarandón para celebrar a XLIII Exaltación do Viño da Ulla

A programación da XLIII Exaltación do Viño da Ulla xa está en marcha e culminará este domingo, 6 de abril, en San Miguel de Sarandón. A festa arrancou o mércores 2 de abril coas Xornadas Técnicas Arredor do Viño da Ulla, que contaron cunha gran acollida e cartel de prazas esgotadas. Estas xornadas inclúen conferencias, saídas de campo e catas.

As catas comentadas, que terán lugar o sábado na Casa da Cultura, aínda contan con algunhas prazas dispoñibles para quen desexe inscribirse a través do formulario da web municipal. Ademais, os amantes do motor poderán desfrutar de dúas rutas: unha de motos o sábado e outra de coches antigos o domingo. A organización lembra que as prazas son limitadas e as inscricións deben facerse canto antes vía WhatsApp no 659 617 631.

O sábado 5 de abril promete festa e música en galego con “Os John Deeres” e “The Rapants”, pechando a noite coa Disco Móbil Chocolate. O domingo 6 de abril será o día grande da celebración, cunha xornada completa de música e actividades, incluíndo actuacións da Escola de Música de Santa Cruz de Ribadulla, A Requinta de Lampai, a charanga “Os Atrevidos” e o grupo “Cantigas e Agarimos”, para culminar coa actuación da orquestra “París de Noia”.

Unha fin de semana chea de tradición, música e viño da Ulla agarda en San Miguel de Sarandón.