Santa Isabel acollerá un torneo solidario que nace coa vocación de consolidarse en Santiago

• A primeira edición do Memorial Jesús Pampín celebrarase este sábado no campo municipal de Santa Isabel coa participación de equipos afeccionados e numerosas actividades, destinando toda a recadación á Fundación Andrea, que este ano celebra dúas décadas de traballo ao carón das familias con menores afectados por enfermidades graves.

O deporte como ferramenta de encontro, de solidariedade e tamén de lembranza. Esa é a filosofía coa que nace o I Torneo Solidario Memorial Jesús Pampín, unha cita que se celebrará este sábado no campo municipal de Santa Isabel e que destinará integramente a súa recadación á Fundación Andrea, entidade compostelá que leva vinte anos acompañando a familias con nenos e nenas afectados por enfermidades de longa duración, crónicas ou terminais.

A iniciativa está promovida pola Fundación Andrea e o Partido Popular de Santiago, que presentaron o evento durante unha entrevista en Radio Líder Santiago. No programa participaron a presidenta da Fundación Andrea, Charo Barca, e o presidente do PP compostelán, Borja Verea, quen coincidiron en destacar o carácter social, deportivo e humano dunha cita que pretende consolidarse no calendario da cidade.

Para Borja Verea, a idea nace dunha reflexión sinxela, pero cargada de significado. «A importancia do deporte. O deporte como saúde, o deporte tamén como alegría, o deporte tamén, neste caso, como solidariedade e lembranza», explicou durante a entrevista.

O memorial rende homenaxe a Jesús Pampín, falecido hai aproximadamente un ano, unha persoa moi vinculada ao deporte e á vida pública compostelá. Verea definiuno como «un compañeiro, sobre todo, xeneroso», lembrando que era un apaixonado do fútbol e que o torneo leva o seu nome precisamente para manter vivo o seu recordo.

Pero a solidariedade constitúe o auténtico motor da iniciativa. «Todo o que recademos, todo o que se consiga a través deste memorial, vai ir integramente á Fundación Andrea», subliñou o presidente popular, facendo un chamamento á participación cidadá.

Un torneo aberto á participación

O evento está pensado para que poida participar calquera persoa maior de 16 anos, independentemente da súa condición física ou experiencia futbolística. O obxectivo é compartir unha xornada de convivencia na que o resultado deportivo pasa a un segundo plano.

A organización prevé reunir ata oito equipos, aos que aínda podían sumarse novos participantes nos días previos ao torneo. Ademais da competición deportiva, durante toda a xornada desenvolveranse distintas actividades para o público asistente.

Entre elas destaca o sorteo de tres camisolas da selección española, unha delas asinada polas xogadoras da selección feminina, outra da actual selección masculina e unha terceira camiseta histórica da selección española, converténdose nun atractivo adicional para todas as persoas colaboradoras.

Tamén se está intentando organizar un partido amigable entre representantes públicos e xornalistas, nun ambiente distendido que reforza o carácter participativo do evento.

A Fundación Andrea, vinte anos ao lado das familias

A presidenta da Fundación Andrea, Charo Barca, agradeceu especialmente que o Memorial escollera a entidade como destinataria dos fondos obtidos.

«Todo suma», afirmou durante a entrevista, destacando que iniciativas coma esta permiten seguir desenvolvendo o labor asistencial que realiza a fundación.

Barcia convidou á cidadanía a participar, non só xogando, senón tamén asistindo ao torneo. «Todo o mundo pode animarse a vir ese día. Todo o mundo está convidado. Familias, pequenos, maiores… os que simplemente queiran colaborar poden facelo», sinalou.

A responsable da Fundación Andrea lembrou que a entidade acaba de cumprir vinte anos de actividade, unha efeméride que coincide ademais co recente anuncio da concesión da Medalla Castelao, un recoñecemento institucional que recibiu con especial emoción.

«Con toda ilusión, con todo orgullo, motivo de alegría para todos, un impulsazo, un respaldo enorme», asegurou ao referirse á distinción.

Dúas décadas despois da súa creación, a Fundación Andrea continúa ampliando proxectos e servizos. Barcia explicou que a entidade mantén actualmente numerosas liñas de actuación para apoiar ás familias, entre elas intervencións xudiciais, novos programas asistenciais e o impulso da futura «Casiña», un espazo pensado para ofrecer acollida e apoio ás familias que teñan que desprazarse a Santiago durante os tratamentos hospitalarios.

«Non paramos», resumiu con contundencia, antes de enumerar os distintos proxectos nos que traballa actualmente a organización.

Vocación de continuidade

Os promotores confían en que esta primeira edición sexa só o inicio dun proxecto estable.

«Eso pretendemos», respondeu Borja Verea ao ser preguntado pola continuidade do torneo. O obxectivo, explicou, é ir mellorando ano tras ano, incorporando máis participantes, máis colaboradores e convertendo o Memorial Jesús Pampín nunha referencia solidaria da cidade.

A organización fai un chamamento a toda a cidadanía para participar nesta xornada, xa sexa formando parte dos equipos, colaborando cos donativos ou simplemente acudindo a Santa Isabel para gozar dunha cita na que o deporte servirá de vehículo para lembrar a unha persoa moi querida e, sobre todo, para apoiar o labor diario da Fundación Andrea.

Porque, como resumiu Charo Barca ao longo da entrevista, cada iniciativa solidaria contribúe a seguir acompañando ás familias que máis o necesitan. E, neste caso, tamén permitirá que o legado de Jesús Pampín continúe vivo sobre un terreo de xogo convertido, por un día, nun espazo de memoria, compromiso e esperanza.