Listeners:
Top listeners:
Radio Líder Santiago – 97.7Fm Santiago de Compostela
today6 noviembre, 2023
Valga, 6 de novembro de 2023,- A entidade Telefónica S.A. procedeu nos últimos días á substitución do poste que, no lugar da Devesa (Campaña), ameazaba con derrubarse debido ao mal estado no que se atopaba. E fíxoo, despois de que o Concello lle impuxera unha multa coercitiva de 1.000 euros por incumprir o primeiro prazo outorgado para retirar a estrutura danada e cambiala por outra en bo estado e segura.
Foi o pasado 20 de outubro cando o alcalde, José María Bello Maneiro, emitiu un decreto no que outorgaba un prazo máximo de cinco días a Telefónica para que executara os traballos de substitución do poste. A parte inferior do formigón estaba demolida por completo e o resto do poste estaba tan só sostido polas varas interiores e polos cables do tendido aéreo, provocando un risco evidente de caída e potencial dano aos inmobles lindeiros, a viandantes e a vehículos.
Un informe dos técnicos municipais advertía do perigo que representaba este poste e da necesidade de adoptar, con urxencia, medidas para garantir a seguridade na zona. Foi por iso que se lle outorgou á empresa un prazo máximo de cinco días para ter rematadas as obras de substitución do poste e a estabilización dos tendidos aéreos no caso de ser necesario.
Este prazo transcorreu sen que os traballos se executasen, polo que o alcalde asinou unha nova resolución impoñendo a Telefónica unha multa de 1.000 euros e dándolle un novo prazo de cinco días para regularizar a situación do poste. Neste mesmo documento, apercibíase á compañía de que, a persistencia do incumprimento, suporía a imposición automática de novas multas.
Nos últimos días, Telefónica procedeu a executar as obras, retirando o poste vello que representaba un risco para a seguridade pública e instalando un novo. “Por fin, despois de tanto tempo, a situación na zona é segura”, sinala Bello Maneiro, que aínda así lamenta que a empresa “só decidirá actuar cando comezamos a impoñerlle sancións”.
O rexedor, lembra, que Telefónica aínda ten pendente de cumprir outra das reclamacións efectuadas polo Concello na resolución do pasado 23 de outubro: elaborar e presentar no Concello, nun prazo máximo de tres meses, un informe sobre os postes da súa propiedade que ten no termo municipal, a súa situación e un plan de mantemento dos mesmos.
Ademais, engade Maneiro, Telefónica leva tempo incumprindo o contrato de telecomunicacións asinado co Concello en febreiro de 2021, facturando cantidades por enriba do estipulado e ao non prestar todos os servizos que se recollían no citado contrato.
Escrito por Líder Redacción
Radio Líder Santiago te ofrece una cuidada selección musical donde suenan los grandes clásicos que forman parte de nuestra vida, junto a una selección con las novedades más interesantes.
closeCopyright © 2023 Radio Líder Santiago de Compostela - 97.7 Fm
Comentarios de las entradas (0)