Tensión no goberno tripartito de Arzúa polo ‘control’ da Festa do Queixo

Imaxe: Jose Luis García, primeiro tenente de alcalde de Arzúa e portavoz de A.A

Alternativa por Arzúa (A.A), a forza independente que conforma o tripartito gobernante en Arzúa, expresou a súa «incomodidade e desacordo absoluto» co decreto emitido pola Alcaldía que lles retira a competencia sobre a Festa do Queixo. Segundo AxA, o BNG tomou esta decisión unilateral ao non contar co apoio nin de A.A nin do PSOE, o que está a tensar o goberno tripartito. Critican a «falta de empatía» do BNG cara os seus socios de goberno, lembrando que levan 17 anos organizando a festa con éxito. Solicitan a retirada do decreto e instan a actuar con sentido común e en prol da política institucional.

A pesar desta controversia, Alternativa mantén o seu compromiso co pacto de goberno, afirmando que hai outras cuestións prioritarias que seguirán atendendo. Entre elas, destacan a mellora dos viais das parroquias, a dotación de máis auga potable para o núcleo urbano, a mellora dos servizos municipais e a continuidade da programación cultural de Arzúa. Ademais, Alternativa insiste na necesidade de mellorar a comunicación dentro do tripartito, sinalando exemplos recentes onde se obviaron contribucións significativas de distintas concellarías. Defenden un goberno baseado no diálogo e na cooperación entre as tres forzas políticas, subliñando que non é necesario impoñer vontades a través de decretos.