Treixadura actuará na Estrada o Día das Letras Galegas

Treixadura nunha imaxe de arquivo

O mítico grupo ofrecerá un concerto nocturno o 17 de maio para pór o broche do Día das Letras Galegas, na Praza da Constitución.

É a aposta estradense dentro do plan provincial que busca facilitar aos concellos a programación cultural e artística en lingua galega.

A Estrada, 2 de abril de 2025.- O mes de maio chegará este ano novamente cargado de actividade no Concello da Estrada. Co arranque da tempada de pesca de salmón, tan famosa nos cotos que o río Ulla, e a celebración do evento gastronómico por excelencia do municipio e todo o que rodeará ao seu día grande na terceira fin de semana de maio, o goberno local traballa no deseño do que será a Semana das Letras Galegas. A primeira actividade confirmouse esta mañá. O mítico grupo Treixadura ofrecerá un concerto gratuíto na Praza da Constitución o mesmo 17 de maio, engrandecendo e poñendo broche nocturno ao programa das Letras na capital estradense.

Nun ano no que a Real Academia Galega (RAG) resolveu dedicar o Días das Letras Galegas á poesía popular oral -unha representación colectiva personificada en catro pandeireteiras de Malpica-, o goberno que encabeza Gonzalo Louzao Dono quixo que o 17 de maio soe a tradición na Estrada. Contando co respaldo da Deputación de Pontevedra nesta aposta, o día grande das Letras pecharase ao pé do consistorio estradense co espectáculo musical que ofrece Treixadura, cunha maneira moi característica e persoal de enlazar a raíz musical da cultura galega co xeito de entender hoxe a música tradicional.

O concerto de Treixadura será totalmente gratuíto, grazas á achega fundamental que realiza para o seu financiamento a Deputación de Pontevedra a través do Plan +Música. O concelleira estradense de Cultura, Lucía Seoane, desprazouse hai uns días ata a sede da institución provincial para asistir á presentación das liñas fundamentais do programa, un encontro ao que acudiron representantes de diferentes concellos pontevedreses e que contou coas intervención do presidente provincial, Luis López, e do deputado de Cultura, Jorge Cubela, entre outros. Foron eles os encargados de anunciar que este plan volverá experimentar este ano un novo incremento de fondos, chegando aos 700.000 euros.

A Estrada escolleu destinar a parte que lle corresponda dentro do Plan+Música á contratación de Treixadura, grupo incluído no catálogo dun programa que busca apoiar a actividade artística profesional en galego nos concellos de Pontevedra. A iniciativa pretende favorecer a programación desta natureza en concellos de menos de 50.000 habitantes, contribuíndo a descentralizar a oferta cultural.

Ao longo da súa traxectoria son moitas as melodías que os integrantes de Treixadura rescataron do anonimato e outras tantas creadas para que a cadea de transmisión da música tradicional continúe viva. A formación atesoura 25 anos de gravacións e concertos, 6 discos no mercado, unha variada gama de colaboracións discográficas e un cuarto de século compartindo co público o poder e a forza do canto colectivo.