Tres de tres: o Composala segue invicto tras un vibrante 7-6 ante o Benavente

O Composala asinou unha desas vitorias que curten os grandes equipos. O conxunto santiagués impúxose por 7-6 ao Atlético Benavente nun encontro vibrante, de ida e volta constante, que desatou a loucura no pavillón e levou aos granates ao máis alto da clasificación de Segunda B.

Aínda que o liderato en solitario, tras un pleno de tres vitorias neste arranque ligueiro, é unha anécdota a estas alturas, o verdadeiramente salientable foi a demostración de casta, talento e fe inquebrantable dos pupilos de Gabi Rama ante un dos transatlánticos e aspirantes ao ascenso do grupo.

O partido foi un auténtico correcores. O Composala golpeou de saída cun esperanzador 2-0, mais o Benavente reaccionou con voracidade aproveitando unha expulsión local para darlle a volta ao marcador (2-3). Con oficio e pegada, os santiagueses equilibraron a contienda antes do descanso (3-3).

A segunda metade mantivo o pulso frenético. Os locais volveron estirar a renda ata o 5-3 e incluso perdonaron ocasións para ampliar a brecha cun 6-4. Lonxe de rendirse, os zamoranos aproveitaron para igualar a contienda (6-6) a falta de dous minutos para a conclusión, nun contexto de certa crispación local coas decisións arbitrais que volveron supoñer outra expulsión.

O éxtasis a trinta segundos do final

Cando todo apuntaba ao reparto de puntos, emerxeu o ADN competitivo do Composala. Lonxe de conformarse co empate, os de Gabi Rama asfixiaron a saída de balón do rival na súa propia área. Forzaron o erro na presión e, a só 30 segundos da bucina final, Carlos rubricou o definitivo 7-6 que desatou a euforia local.

Con este triunfo de prestixio, o Composala é o único equipo do grupo con pleno de triunfos (3 de 3) e afronta coa moral polas nubes a súa vindeira saída á pista do Xove FS.

Plantilla e goleadores do Composala: Karpin e Bruno (porteiros); Carlos (3), Jorge, Dani Blanco (1), Pablito (1), Quintás (1), Aldrey (1), Enrique, Álvaro Alarcón, Lucho, Danito e Fran. Adestrador: Gabi Rama.

DECLARACIÓNS GARLOS GARCÍA: «Moi contentos coa terceira vitoria consecutiva e a segunda na casa. Grazas ao inestimable apoio da afección, soubimos sufrir e loitar ata o final malia as dúas expulsións. É un triunfo que nos achega moita ilusión para todo o que resta de tempada».

DECLARACIÓNS GABI RAMA: «Estamos moi contentos coa terceira vitoria consecutiva. Foi un partido moi disputado e de marcador moi longo, con alternancias, expulsións e acertos e erros por ambas partes. Son tres puntos de ouro conseguidos nos últimos minutos con garra e esforzo. É unha vitoria de equipo, desas que fan crecer a un grupo»