Un terremoto no Bierzo séntese en Santiago e en numerosos concellos de Galicia

Redacción, 16 de outubro de 2026.— Un terremoto de magnitude 4,2 con epicentro na comarca leonesa do Bierzo deixouse sentir na noite deste xoves en numerosos puntos das catro provincias galegas. A sacudida percibiuse en Santiago de Compostela e en varios concellos da súa contorna. Segundo a información dispoñible ao peche desta edición, non constaban danos persoais nin materiais de relevancia en Galicia.

O movemento principal produciuse ás 22.34.45 horas do 15 de outubro. Tras unha primeira localización provisional na contorna de Priaranza del Bierzo, o Instituto Xeográfico Nacional (IGN) situou o epicentro ao leste de Benuza, na provincia de León. O organismo asignoulle unha magnitude de 4,2 mbLg e unha intensidade máxima de IV-V na escala macrosísmica europea.

A magnitude mide o tamaño do terremoto, mentres que a intensidade describe os seus efectos en cada lugar. En Galicia, os rexistros recollidos sitúan a percepción principalmente entre os niveis II e III.

O tremor sentiuse en Santiago e en varios concellos da contorna

Na comarca de Santiago, o terremoto percibiuse nos concellos de Santiago de Compostela, Ames, Teo, Vedra, Brión e Val do Dubra. Tamén se comunicou a súa percepción noutros municipios da contorna, como Oroso, Arzúa e Melide.

No municipio compostelán, o IGN recolle comunicacións desde O Eixo e San Lázaro, con intensidade II-III, e desde Conxo, O Castiñeiriño e outros puntos da cidade, con intensidade II.

En Vedra, o tremor sentiuse en Cimadevila, onde figura unha intensidade II-III. Tamén aparecen rexistros en Bugallido e Maguxe, no concello de Ames; O Rial, en Brión; Os Tilos, en Teo; e Paramos, en Val do Dubra, todos eles con intensidade II.

Na provincia de Lugo figuran avisos nos concellos de Quiroga, Triacastela, Lugo, Becerreá, Sarria, Monforte de Lemos, Vilalba, Ribadeo, Foz, O Corgo, Outeiro de Rei e Folgoso do Courel. En Quiroga, Triacastela e distintos puntos do municipio de Lugo recolléronse intensidades de nivel III.

Na provincia de Ourense comunicouse a percepción do sismo nos concellos do Barco de Valdeorras, Ourense, Verín, Celanova, Ribadavia, Viana do Bolo e Xinzo de Limia.

Na provincia de Pontevedra houbo avisos en Lalín, Silleda, Pontevedra, Vigo, Tui, Vilagarcía de Arousa, Salvaterra de Miño, Moaña, Cuntis e Soutomaior.

Na provincia da Coruña, ademais de Santiago, Ames, Teo, Vedra, Brión, Val do Dubra, Oroso, Arzúa e Melide, o tremor percibiuse nos concellos da Coruña, Ferrol, Oleiros, Cambre, Narón, Betanzos, Carballo, A Laracha, As Pontes, Sada, Rianxo e Negreira, entre outros.

Réplicas durante a noite

A Rede Sísmica Nacional detectou varios movementos de menor magnitude despois do terremoto principal, na contorna de Benuza, Priaranza del Bierzo, Molinaseca e Borrenes.

Os datos dispoñibles recollen polo menos oito movementos posteriores ata as 23.33 horas. O de maior magnitude nese intervalo, de 2,4, rexistrouse ás 23.22 ao nordés de Benuza.

O IGN mantén aberto o seu cuestionario macrosísmico para que as persoas que sentiron o tremor comuniquen onde estaban e que percibiron. Esa información permitirá precisar a extensión e a intensidade da sacudida.