Verea acusa o goberno local de non preparar a cidade para o Ano Santo

• O líder do PP de Santiago pon en valor o traballo que xa están desenvolvendo a Xunta de Galicia e o Arcebispado na preparación do Xacobeo
• “Santiago non é simplemente o lugar onde chegan os peregrinos, é a razón pola que comezan a camiñar desde diferentes puntos do planeta”

O líder do PP de Santiago, Borja Verea, chamou a preparar a cidade para aproveitar “a oportunidade extraordinaria” que representa o Ano Santo 2027 e defendeu a necesidade de chegar ao inicio do Xacobeo cunha planificación que permita responder tanto ás necesidades dos composteláns como ás das persoas que visitarán Santiago.

Durante a súa intervención no Parlamento de Galicia, Verea reivindicou a importancia histórica, espiritual e social do Ano Santo e o papel único que ocupa Compostela no Camiño de Santiago. “Santiago non é simplemente o lugar onde chegan os peregrinos. É a causa, é a razón pola que comezan a camiñar desde diferentes puntos do planeta”, afirmou.

O líder popular lembrou que durante máis de mil anos millóns de persoas percorreron Europa buscando chegar á tumba do Apóstolo e que esa historia foi construíndo, xeración tras xeración, “unha parte esencial da identidade santiaguesa e da identidade galega”.

Por iso, sinalou que preparar un Ano Santo significa tamén asumir “a responsabilidade de transmitir e compartir unha herdanza que recibimos de moitas xeracións anteriores e que temos a obriga de entregar ás seguintes”.

Verea destacou que un acontecemento desta dimensión require “planificación, investimentos e coordinación” e puxo en valor o traballo que xa están desenvolvendo dúas das institucións fundamentais na preparación do Ano Santo: a Xunta de Galicia e o Arcebispado de Santiago.

Neste sentido, destacou a planificación da Administración autonómica para o Xacobeo 2027 e referiuse ao Plan Director dos Camiños de Santiago, cun investimento de máis de 140 millóns de euros, á programación institucional do Xacobeo, á súa identidade corporativa, ao programa O teu Xacobeo e á colaboración co sector privado en materia de patrocinios.

Tamén puxo en valor o traballo do Arcebispado de Santiago, que xa deu pasos públicos na preparación do Ano Santo coa presentación do lema, a identidade visual e o himno. Verea destacou especialmente a dimensión espiritual da celebración, “unha dimensión esencial que temos que protexer, recoñecer e respectar”.

Unha cidade preparada para o Xacobeo

O líder do PP de Santiago incidiu en que a preparación do Ano Santo debe traducirse tamén en actuacións concretas na cidade. Limpeza, mobilidade, seguridade, mantemento dos espazos públicos, información aos visitantes e atención aos peregrinos son algúns dos ámbitos nos que considera necesario anticiparse e planificar.

Verea subliñou, ademais, que preparar Santiago para 2027 non significa pensar unicamente nas persoas que chegarán á cidade, senón tamén nos composteláns que viven e traballan nela e que compartirán os seus espazos cunha actividade extraordinaria durante o Ano Santo.

“O éxito do Xacobeo non debe medirse exclusivamente polo número de visitantes ou de peregrinos. É importante comprobar como funciona a cidade, como se atende ás persoas que nos visitan e como viven os santiagueses e as santiaguesas”, afirmou.

Neste sentido, Verea asegurou que “o Ano Santo ofrece unha oportunidade extraordinaria para Galicia e supón unha responsabilidade especial para Santiago” e engadiu: “Eu traballo para ser alcalde do Xacobeo a partir de maio e gustaríame atoparme unha cidade preparada”.

Fronte ao traballo da Xunta e do Arcebispado, “nada de nada” do goberno local

Verea contrastou finalmente os avances na preparación do Xacobeo por parte da Xunta de Galicia e do Arcebispado coa situación do Concello de Santiago, a terceira institución que, segundo destacou, ten unha responsabilidade fundamental no Ano Santo.

A menos de tres meses do inicio de 2027, o líder popular preguntou ao goberno do BNG que medidas ten previstas para preparar a cidade: “Que actuacións ten previstas o Concello? Que recursos vai dedicar? Que calendario de traballo ten previsto?”.

“A Xunta de Galicia está traballando, o Arcebispado está traballando e o goberno local de Santiago non está facendo absolutamente nada”, afirmou Verea, que cualificou de “auténtica irresponsabilidade” chegar a este momento sen que se coñezan actuacións, recursos ou un calendario específico do Concello para o Ano Santo.

“Quedan poucos meses. É o momento de concretar os preparativos, coordinar as actuacións e chegar ao inicio de 2027 co traballo feito”, concluíu.