Luís Gayoso, avogado de FISELA: “As sociedades son máis difíciles de disolver ca un matrimonio”

• O avogado do departamento xurídico de FISELA analiza os principais conflitos legais de autónomos e empresas, a evolución do control fiscal e a importancia do asesoramento integral nun contexto empresarial cada vez máis complexo.

O departamento xurídico de FISELA continúa consolidándose como unha das áreas estratéxicas do grupo empresarial compostelán, especializado no asesoramento integral a empresas, autónomos e particulares. Nunha entrevista centrada nos desafíos legais actuais, o avogado Luís Gayoso explicou o funcionamento interno do equipo legal, os problemas máis frecuentes cos que traballan e os cambios normativos que están marcando o día a día empresarial.

Gayoso destacou a dimensión transversal de FISELA, un grupo que supera xa os 80 profesionais e que integra departamentos laboral, fiscal, contable e xurídico. Segundo explicou, esta estrutura permite ofrecer respostas rápidas e coordinadas a problemas complexos: “O bo de FISELA é que todo o que abrangue unha empresa ou un negocio está cuberto. Iso permítenos dar solucións moito máis rápidas e efectivas”.

Dentro da área legal, o avogado está especializado no ámbito mercantil, un dos campos con maior actividade actualmente. Constitución de sociedades, ampliacións de capital, conflitos entre socios, fusións empresariais ou procesos de liquidación forman parte habitual do seu traballo. Precisamente sobre os conflitos societarios deixou unha das reflexións máis comentadas da entrevista: “As sociedades son bastante máis difíciles de disolver ca un matrimonio”.

Gayoso explicou que moitos dos problemas aparecen cando existen sociedades ao 50%, onde dous socios teñen o mesmo poder de decisión e as discrepancias paralizan completamente a actividade da empresa. “Un di branco e outro negro, e aí é cando aparecen os grandes conflitos”, apuntou.

Outro dos ámbitos nos que FISELA presta especial apoio é o asesoramento a autónomos, unha figura que definiu como “unha empresa en miniatura”. O letrado subliñou a enorme presión que soportan estes profesionais: “Se hai unha persoa neste país que teña 50.000 frontes abertas, é un autónomo”. Problemas laborais, reclamacións de débedas, cuestións tributarias ou conflitos con clientes e provedores forman parte das consultas máis frecuentes.

Entre os casos máis habituais que chegan ao despacho, Gayoso sinalou a transformación de autónomos en sociedades mercantís cando o negocio medra e precisa dunha estrutura máis sólida ou dunha maior protección patrimonial. Tamén destacou as reclamacións de cantidades impagadas entre empresas, especialmente mediante procedementos monitorios.

Durante a conversa, o avogado puxo exemplos prácticos que evidencian o descoñecemento legal que existe mesmo entre profesionais con ampla experiencia. Un dos casos foi o dun taller mecánico que descoñecía que podía reter legalmente un vehículo ata que o cliente pagase a reparación. “O Código Civil permite reter un ben móbil cando se realizou un traballo sobre el e non se abonou o importe correspondente”, explicou.

Tamén abordou cuestións relacionadas coa adaptación dixital das empresas e os novos sistemas de control fiscal impulsados pola Axencia Tributaria. Gayoso referiuse ao sistema VeriFactu e á obrigatoriedade futura de dixitalizar os procesos de facturación. Segundo indicou, moitas empresas xa iniciaron esa adaptación ante un escenario no que Facenda busca un control cada vez máis exhaustivo da actividade económica.

Neste contexto, mostrouse convencido de que o futuro camiña cara á redución progresiva do uso do efectivo. “A longo prazo creo que desaparecerá o diñeiro físico”, asegurou, aínda que tamén advertiu das implicacións que isto pode ter sobre a privacidade e as liberdades individuais: “Sempre debería existir unha marxe de liberdade para facer compras sen que a administración saiba exactamente en que gastas o teu diñeiro”.

A entrevista serviu tamén para poñer en valor o papel pedagóxico que desempeñan asesorías como FISELA. Gayoso incidiu en que moitos empresarios descoñecen cuestións básicas sobre o funcionamento dunha sociedade mercantil, especialmente a separación entre o patrimonio persoal e o da empresa. “Hai que explicar que os cartos da sociedade non son do socio”, advertiu.

O avogado concluíu reivindicando a importancia de contar cun equipo multidisciplinar que permita acompañar ás empresas en todas as etapas da súa actividade, desde a creación ata a resolución de conflitos ou os procesos de crecemento e transformación.