A SD Compostela e o Sigüeiro FC poñen fin a cinco anos de colaboración deportiva

O convenio permitiu a formación e proxección de numerosos canteiráns composteláns e consolidou ao club orosano como un referente na Preferente de Galicia. 

A SD Compostela e o Sigüeiro FC acordaron poñer fin ao convenio de colaboración que uniu ambas entidades durante as últimas cinco tempadas. A decisión chega por iniciativa da nova xunta directiva do club orosano, que trasladou á entidade compostelá a súa vontade de emprender unha nova etapa deportiva cun proxecto propio.

Nun comunicado emitido este mércores, a SD Compostela expresou o seu respecto pola decisión adoptada polo Sigüeiro FC e destacou o carácter cordial co que se desenvolveu o proceso. Ambas as partes coinciden en cualificar como moi positiva unha relación que contribuíu ao crecemento deportivo dos dous clubs.

Durante estes cinco anos, o acordo converteuse nunha ferramenta fundamental para o desenvolvemento dos futbolistas da Canteira Picheleira. Tras rematar a súa etapa xuvenil, numerosos xogadores atoparon no conxunto de Oroso un escenario idóneo para continuar a súa progresión e dar o salto cara ao primeiro equipo compostelanista.

No plano deportivo, o Sigüeiro FC consolidouse como un dos equipos máis competitivos da Preferente Galicia, mantendo unha destacada presenza na categoría e logrando un segundo posto e dous terceiros postos como mellores clasificacións. Ademais, durante este período, o club orosano conquistou a terceira Copa do Sar da súa historia.

Desde a SD Compostela quixeron agradecer publicamente “todas as facilidades e a excelente colaboración” mantida polo Sigüeiro ao longo desta etapa, así como recoñecer o labor desenvolvido pola directiva encabezada por Antonio Liñares Nouche. Do mesmo xeito, a entidade branquiazul destacou a sinceridade e o respecto coa que a nova directiva, presidida por José Daniel Viqueira, comunicou a súa decisión.

O club compostelán despediu esta etapa desexando ao Sigüeiro FC os maiores éxitos no seu novo camiño e nos desafíos que afrontará nos vindeiros anos.