O BNG de Ames leva a pleno as necesidades do Parque Empresarial Novo Milladoiro

• Reclama a creación de novas bolsas de estacionamento e alternativas que permitan reducir a presión existente nas súa rúas, realizar un estudo técnico e rigoroso sobre a mobilidade, tráfico, estacionamento e seguridade viaria e defende, de novo, a necesidade dun acceso directo para o polígono empresarial.
• O PSOE de Ames négase a estas melloras pese a que numerosas persoas usuarias e empresas do parque manifestan a existencia de importantes problemas de tráfico e mobilidade.
• “O futuro desenvolvemento económico de Ames require que este parque empresarial conte con infraestruturas adaptadas á realidade actual e ás necesidades das empresas que alí desenvolven a súa actividade”, subliña a voceira do BNG de Ames, Escarlata Pampín.

Ames, 26 de xuño de 2026. Os nacionalistas constatan ademais que hai por parte dos empresarios/as unha crecente preocupación respecto da seguridade do recinto. “Descoñécese o estado operativo do sistema de vídeo vixilancia existente, o seu mantemento, o alcance da súa cobertura e a súa efectividade como ferramenta de prevención e investigación de posibles incidencias” denuncia Escarlata Pampín. “A existencia dun sistema de seguridade eficaz e correctamente xestionado constitúe un elemento fundamental para garantir a protección das persoas, das instalacións e da actividade económica que se desenvolve no parque empresarial”, engade.

A redución da capacidade viaria nalgunhas rúas provocou unha maior dificultade para a circulación de vehículos pesados, o impedimento de operacións de carga e descarga e cruzamentos en determinados puntos, provocando situacións que non existían con anterioridade. Na súa intervención no pleno, Escarlata Pampín denunciou que dende hai anos os usuarios e usuarias do polígono empresarial están facendo propostas con respecto a diversas cuestións como, por exemplo, o estacionamento e que o partido socialista foinas desbotando, “hai un grave problema e vostedes sábeno e por iso está no polígono todos os días a policía local polo tanto francamente non entendo non apoiar esta moción, tirar balóns fóra dicindo que xa está feito e mirar cara outro lado”, argumentou.

O BNG de Ames lamenta que incluso a demanda de priorizar de xeito urxente a construción dun acceso propio ao Parque Empresarial do Novo Milladoiro non contase co apoio do goberno socialista, pese a isto a moción saíu adiante cos votos de toda a oposición.