Arzúa honra a Xulio Vázquez Carril e dá o seu nome á Casa da Cultura

O Concello de Arzúa rendeu este sábado unha homenaxe a Xulio Vázquez Carril, coñecido como «O Gaiteiro de San Miguel», nun acto institucional no que a Casa da Cultura pasou a denominarse oficialmente Casa da Cultura Xulio Vázquez Carril, en recoñecemento á súa contribución á música tradicional galega e á conservación da cultura popular.

A xornada reuniu familiares, representantes municipais, integrantes do movemento da música tradicional e numerosos veciños e veciñas que quixeron participar nun recoñecemento a unha das figuras máis destacadas do patrimonio cultural arzuán.

O acto, conducido polo concelleiro de Xuventude, Daniel Moscoso, comezou coa proxección dun vídeo que repasou, a través de imaxes, a vida e a traxectoria do gaiteiro, desde os seus inicios ata a súa recuperación da actividade musical tras a xubilación.

Na súa intervención, o alcalde de Arzúa, Xoán Xesús Carril, destacou a importancia de preservar a memoria das persoas que dedicaron a súa vida á transmisión da música tradicional e da cultura popular galega. Salientou, ademais, a pegada que Xulio Vázquez Carril deixou tanto en Arzúa como no conxunto de Galicia.

A familia do homenaxeado compartiu tamén unhas palabras de lembranza, ofrecendo unha visión máis persoal da súa figura e do seu compromiso coa música.

Outro dos momentos destacados chegou coa intervención de Carlos Rodríguez Osorio, compañeiro de Xulio no grupo Os Gaiteiros de San Miguel, quen evocou a relación persoal e musical que mantiveron desde que, no ano 2003, impulsaron xunto a Manuel Noia e Xosé Tuñas o regreso do gaiteiro ás foliadas.

A parte musical correu a cargo das agrupacións Fol da Chousa Vella (Santiso), Santiaguiños (Boimorto) e Fiadeira (Melide), que interpretaron a Marcha do Antigo Reino de Galicia, convertendo a música tradicional no fío condutor dunha homenaxe cargada de simbolismo.

O acto concluíu coa interpretación do Himno Galego e coa descuberta dunha placa conmemorativa, elaborada por Sargadelos, que certifica a nova denominación da Casa da Cultura.

Un referente da tradición oral
Natural da parroquia de Maroxo, Xulio Vázquez Carril iniciou a súa aprendizaxe da gaita sendo moi novo, aprendendo de oído e practicando primeiro con pallas de centeo. A súa primeira gaita foi un agasallo do seu curmán Basilio Carril, un dos grandes artesáns e gaiteiros galegos do século XX.

Despois de permanecer afastado da música durante décadas, recuperou a súa paixón coa chegada da xubilación, converténdose nun referente das foliadas e nun dos principais transmisores do toque «ao pechado», unha forma de interpretar propia da zona que espertou o interese de músicos e investigadores de toda Galicia.

Coa dedicación do principal espazo cultural do municipio ao seu nome, Arzúa perpetúa a memoria dun músico que fixo da tradición oral, da gaita e da transmisión do coñecemento un legado que continúa vivo nas novas xeracións.