O BNG de Ordes esixe investigar a aparición de numerosas troitas mortas no río Cabrón

O Grupo Municipal do BNG de Ordes presentou un rogo ao alcalde para que o Concello investigue a aparición de numerosas troitas mortas no río Cabrón, á altura de Guindiboo de Arriba, así como no rego da Fraga, nas proximidades da Estación Depuradora de Augas Residuais (EDAR) de Ordes.

O portavoz municipal do BNG, Pablo Vidal Ríos, solicita que se determine a causa da mortaldade destes exemplares e que se comprobe se este episodio puido estar relacionado cun posible vertido ou cun foco de contaminación procedente da depuradora, tendo en conta que a zona afectada se atopa augas abaixo desta instalación.

No seu rogo, a formación nacionalista reclama que, no caso de detectarse algún problema ou deficiencia no funcionamento da EDAR, o Concello actúe de maneira inmediata para corrixilo e evitar que se repitan episodios semellantes no futuro.

O BNG considera imprescindible esclarecer canto antes o sucedido, tanto polo impacto ambiental que supón para o ecosistema fluvial como pola necesidade de garantir a calidade das augas e a protección da fauna dos ríos do municipio.