Oroso ampliará e renovará o parque canino de Porto Avieira

O Concello de Oroso e a Xunta de Galicia deron un novo paso para mellorar os espazos públicos do municipio coa sinatura do protocolo de colaboración que permitirá acometer a ampliación e renovación do parque canino de Porto Avieira.

A actuación contará cun investimento de preto de 50.000 euros e permitirá modernizar as instalacións, reforzar a seguridade do recinto e incorporar novos servizos e equipamentos para facer do parque un espazo máis cómodo, accesible e funcional.

Entre as melloras previstas figuran a instalación de fontes adaptadas para cans, papeleiras específicas, dispensadores de bolsas, unha zona de xogos, bancos, nova vexetación e áreas de sombra que incrementarán o confort das persoas usuarias e das súas mascotas.

Ademais, o parque incrementará a súa superficie, pasando dos actuais 950 metros cadrados a arredor de 1.100 metros cadrados, ofrecendo un espazo máis amplo para o lecer e a socialización dos animais.

Con esta actuación, o Concello de Oroso reafirma o seu compromiso coa mellora continua dos servizos municipais e coa creación de espazos públicos de calidade que contribúan ao benestar da veciñanza.