O movemento animalista cita á cidadanía no Obradoiro: «Os gatos tamén teñen lei»

• A mobilización celebrarase o 6 de setembro ás 12.00 horas fronte ao Pazo de Raxoi baixo o lema «Os gat@s tamén teñen lei» e reclamará máis protección para as colonias felinas e recursos para aplicar o método CER.

O movemento animalista galego convocou para o vindeiro 6 de setembro unha concentración na Praza do Obradoiro, en Santiago de Compostela, para denunciar a situación das colonias felinas e reclamar ás administracións locais o cumprimento da normativa de benestar animal.

A protesta, que dará comezo ás 12.00 horas fronte ao Pazo de Raxoi, desenvolverase baixo o lema «Os gat@s tamén teñen lei». A convocatoria parte do grupo de xestoras felinas de Galicia e conta co apoio e aval de diferentes asociacións e entidades vinculadas á protección animal.

As convocantes queren poñer o foco na que consideran unha situación de desprotección das colonias de gatos comunitarios e reclamar aos concellos unha aplicación efectiva das obrigas establecidas pola lexislación en materia de benestar animal.

Entre as principais reivindicacións figura a necesidade de contar con dotación orzamentaria suficiente para desenvolver o método CER (Captura, Esterilización e Retorno), destinado ao control ético das poboacións felinas. O colectivo tamén reclama que se poña fin ao que cualifica como «persecución» das persoas voluntarias que se encargan da atención e xestión das colonias.

A mobilización terá lugar nun dos espazos máis simbólicos de Santiago, a Praza do Obradoiro, coa sede do Concello compostelán como escenario de fondo, e pretende converterse nunha chamada de atención ás administracións sobre a protección e xestión das colonias felinas.