Unha peregrina resulta ferida tras caer por un terraplén en Padrón

GES PADRÓN

Unha peregrina tivo que ser evacuada a un centro hospitalario tras sufrir unha caída nas proximidades do Santiaguiño do Monte, en Padrón. O suceso rexistrouse na noite deste martes, cando a muller se atopaba nunha zona próxima á ermida.

Ao parecer, a peregrina estaba sentada nun valado cando perdeu o equilibrio e caeu cara atrás por un terraplén duns cinco ou seis metros de altura.

Ata o lugar desprazáronse efectivos de Protección Civil e do GES de Padrón, que se encargaron das tarefas de rescate da muller debido ás características do punto no que se produciu a caída. No operativo tamén participou a Policía Local.

Os feitos tiveron lugar arredor das 21.00 horas. Tras ser rescatada e recibir unha primeira atención, a peregrina foi trasladada ao hospital para ser atendida das lesións sufridas como consecuencia da caída.