A veciñanza de Amio rexeita a supresión das liñas C5 e C6 e reclama manter as conexións directas

Os residentes advirten de que a nova liña 3 obrigará a facer transbordos para chegar a centros sanitarios, educativos e outros destinos habituais de Santiago.

A veciñanza de Amio manifesta o seu rexeitamento á supresión das liñas de autobús C5 e C6, que, segundo explica, levan décadas prestando servizo ao barrio. Os residentes consideran que a súa substitución pola nova liña 3 suporá a perda de conexións directas con distintos puntos de Santiago e dificultará os desprazamentos cotiáns.

Segundo o relato veciñal, unha representación do barrio trasladou esta oposición nunha xuntanza co responsable de TUSSA e co concelleiro de Compostela Aberta Xan Duro. Os asistentes aseguran que os responsables lles defenderon que o novo servizo melloraría a mobilidade de Amio e que a decisión non tiña volta atrás.

A veciñanza discrepa desa valoración. Sostén que o percorrido previsto para a liña 3, entre o polígono de Costa Vella e Villestro, obrigará a realizar transbordos en San Lázaro ou nas Cancelas para chegar a destinos aos que ata agora podían acceder directamente.

Entre os lugares afectados citan os Concheiros, o Multiusos de Sar, o Paxonal, a estación intermodal e os centros de saúde Concepción Arenal e Fontiñas. Segundo os tempos achegados polos residentes, as conexións actuais permiten chegar aos Concheiros en entre dez e quince minutos, ao Multiusos de Sar en dez e ao Paxonal en quince.

Unha das principais preocupacións é o acceso ao centro de saúde de Fontiñas. Os veciños alertan das dificultades que os transbordos poden supoñer para as persoas maiores, especialmente aquelas que se desprazan soas, á hora de calcular o tempo necesario para chegar ás citas médicas. Tamén reclaman que se teñan en conta os desprazamentos do alumnado de Amio ao IES Antón Fraguas.

Os residentes piden aclaracións sobre a coordinación dos horarios, os tempos de espera e a localización das paradas de intercambio. Así mesmo, preguntan como quedará atendida a poboación da rúa do Porto do Medio co novo trazado.

A veciñanza reclama ao Concello explicacións sobre os criterios que motivan a reorganización e considera que un cambio desta dimensión debe ter en conta as necesidades diarias do barrio. «En Amio xa non pedimos grandes cousas, pero polo menos que non nos quiten o pouco que temos», sinalan, ao tempo que anuncian que seguirán mobilizándose para reclamar «un autobús digno».