Rianxo volverá ter a árbore de Nadal natural máis alta de España

Rianxo xa iniciou os traballos de montaxe do alumeado de Nadal, que nos próximos días irán chegando ás distintas aldeas do municipio para engalanar as rúas durante as festas.

Un dos principais atractivos volverá ser a árbore de Nadal natural que, segundo o anuncio municipal, é a máis alta de España.

Ademais, tras a boa acollida da pasada edición, o Mercado Municipal de Rianxo acollerá de novo un Mercado de Nadal. Os detalles desta iniciativa daranse a coñecer nos próximos días.

Con estes preparativos, o municipio comeza a quentar motores para unhas festas nas que a iluminación e as propostas de encontro e comercio local volverán ter protagonismo.