Boiro e Rianxo impulsan a construción dun centro compartido de acollida de animais abandonados

Os alcaldes de Boiro e Rianxo, José Ramón Romero e Julián Bustelo, mantiveron unha xuntanza de traballo para impulsa a construción desta importante infraestrutura para os dous municípios.

Na actualidade, tanto o concello de Boiro como o concello de Rianxo teñen externalizado o servizo de recollida de animais abandonados, un servizo de competencia municipal de acordo co establecido na Lei 4/2017, do 3 de outubro, de protección e benestar dos animais de compañía de Galicia lle corresponde aos municipios

Dado o crecente incremento nos últimos anos en relación coa cifra de animais abandonados por parte dos seus propietarios e propietarias, a recollida e atención destes resulta cada vez máis custoso para os municipios. Así as cousas, e co obxectivo último de prestar este servizo dunha maneira moito máis eficaz e eficiente, os Gobernos de Boiro e Rianxo veñen traballando no deseño dun centro compartido de acollida de animais abandonados coa finalidade de dotarse dunha infraestrura capaz de albergar os animais – cans e gatos fundamentalmente – abandonados ou extraviados nos dous municipios.

O centro, que tería unha superficie útil total superior aos 400 metros cadrados, estaría localizado nunha parcela titularidade do concello de Boiro situada no lugar de Triñáns (Boiro). Contaría con canís e gateiras sufientes para atender a demanda existente, así como cun deseño modular que permitiría levar a cabo futuras adaptacións no caso de que resultara necesario un espazo maior.

A existencia deste espazo non só abarataría enormemente os custos do servizo ao non ter que desprazar os animais a puntos máis afastados, senón que tamén evitaría que os donos dos animais extraviados se tiveran que desprazar a outras localidades a recoller as súas mascotas.

No caso de Rianxo, no ano 2025 recolléronse máis de 70 animais abandonados e na actualidade máis de medio cento están no centro de acollida da empresa responsable do servizo – localizado en Zas (A Coruña) – agarando a seren adoptados. O servizo de recollida de animais abandonados supón un custo de aproximadamente 85.000€ anuais para as arcas municipais. No caso do concello de Boiro, este servizo supuxo no ano 2025 un gasto de case 130.000€, rexistrándose un incremento notable nos últimos anos.

Os rexedores agardan que con este proxecto minore o custo do servizo para as arcas municipais, á vez que mellora a prestación do mesmo.

Esta nova liña de traballo conxunto encádrase na estreita colaboración que se vén dando entre os Gobernos de Boiro e Rianxo nos últimos meses para impulsar infraestruturas de interese para os dous municipios.