Gadis e Monbus Obradoiro doan 770 quilos de alimentos ao Albergue Xoán XXIII

Supermercados Gadis e o Monbus Obradoiro CAB entregaron 770 quilos de alimentos non perecedoiros ao Albergue Xoán XXIII de Santiago de Compostela. A doazón foi froito do 12º Partido Solidario Gadis, disputado o pasado 14 de decembro no Multiúsos Fontes do Sar, entre o equipo santiagués e o Fuenlabrada.

Por cada punto anotado durante o encontro, Gadis doou 5 quilos de produtos. Con 154 puntos totais (75 do Monbus Obradoiro e 79 do Fuenlabrada), o albergue recibiu 770 quilos para apoiar o seu labor con colectivos vulnerables.

No acto de entrega estiveron presentes membros do Monbus Obradoiro, como Rafa Silva e Héctor Galán, xunto cos xogadores Pablo Harguindey e Alonso Grela; Miguel Freire, en representación de Gadisa; e Frei Miguel de la Mata Merayo, director do Albergue Xoán XXIII.

Desde o inicio desta colaboración, Gadis e o Monbus Obradoiro levan doado máis de 7.500 quilos de alimentos para apoiar colectivos desfavorecidos.