Un atropelo na rúa do Tambre, en Santiago, deixa un peón ferido grave

Un peón resultou ferido de gravidade na tarde do mércores ao ser atropelado nun paso de peóns da rúa do Tambre, en Santiago de Compostela. O accidente rexistrouse ás 15.30 horas nesta vía que une o Cruceiro da Coruña co polígono industrial, na zona norte da cidade.

A Policía Local atendeu ese mesmo día outro atropelo na avenida de Lugo. Neste caso, o suceso produciuse ás 14.24 horas e a persoa afectada sufriu lesións leves.

A xornada deixou tamén un ferido leve nunha colisión entre dous vehículos na rúa Frei Rosendo Salvado, ocorrida ás nove da mañá.

Outros tres accidentes saldáronse con danos materiais: unha colisión no Hórreo ás 17.00 horas e dous sinistros nas rúas Ramón Piñeiro e Amio, ás 20.06 e ás 20.41 horas, respectivamente.