Galicia prepárase para o minuto máis esperado do verán

• O director de Turismo de Galicia destaca en Radio Líder Santiago a elevada ocupación provocada polo fenómeno astronómico, chama a extremar a protección dos ollos e a prudencia nos desprazamentos e confía en que o eclipse deixe tamén unha importante repercusión turística e económica na comunidade

Galicia afronta este mércores, 12 de agosto, unha das xornadas máis singulares dos últimos anos. A expectación polo eclipse disparouse nas últimas semanas e, a poucas horas do fenómeno, o director de Turismo de Galicia, Xosé Manuel Merelles, asegurou nunha entrevista en Radio Líder Santiago que a comunidade chega preparada para recibir aos numerosos visitantes que se desprazaron para contemplalo.

«É unha xornada moi especial para Galicia, porque vai ser a porta de entrada deste fenómeno que tanta expectación está levantando desde hai xa moito tempo», salientou Merelles durante a conversa. O responsable turístico explicou que a Xunta leva meses traballando arredor do acontecemento e lembrou que xa na Feira Internacional de Turismo de Madrid se presentou o eclipse como «un dos fenómenos turísticos máis importantes» que ían acontecer este ano en Galicia.

A resposta do público, segundo explicou, xa se deixa notar nos establecementos turísticos. «Temos unha ocupación moi elevada en practicamente toda Galicia con motivo deste fenómeno astronómico», afirmou. Merelles considera que as reservas se foron producindo con suficiente antelación e sostén que Galicia está «perfectamente preparada para acoller, desde o punto de vista turístico, os visitantes que queren observar desde Galicia este fenómeno».

Os destinos Starlight, entre os puntos de referencia

Turismo de Galicia centrou boa parte do seu traballo nos nove destinos Starlight existentes na comunidade. Seis deles atópanse na zona na que está prevista a totalidade do eclipse e acollerán actividades vinculadas á observación astronómica.

«Traballamos desde principios de ano, fundamentalmente, cos nove destinos Starlight de Galicia, que están distribuídos por todo o territorio», explicou Merelles. Trátase, engadiu, de lugares especializados «no avistamento de estrelas e de fenómenos astronómicos», nos que se desenvolverán actividades específicas e, en numerosos casos, profesionalizadas. A estas iniciativas súmanse as organizadas por diferentes concellos.

A magnitude do acontecemento levou tamén á coordinación entre administracións. Merelles confirmou que o pasado venres quedou constituído o Centro de Coordinación Operativo Integrado, no que participan Turismo de Galicia, departamentos da Administración autonómica e representantes do Goberno central. «Estaremos pendentes neste Centro de Coordinación de todo o que aconteza en Galicia en relación ao eclipse», indicou.

Un fenómeno que tardará moito en repetirse

Durante a entrevista quedou patente a enorme expectación xerada entre galegos e visitantes. Merelles incidiu no carácter excepcional dunha cita que, para boa parte da poboación, será practicamente irrepetible.

«Vai tardar moito en repetirse e moitos dos que o vivamos agora, practicamente todos, non o imos volver ver», sinalou. Ante esa circunstancia, asegurou que o obxectivo das administracións é estar preparadas para que o fenómeno «se vexa con toda tranquilidade» e para que a xornada transcorra con normalidade.

O eclipse non se observará coa mesma intensidade en toda Galicia. Segundo explicou o director de Turismo atendendo ás indicacións científicas, existe unha diferenza notable entre estar dentro da franxa de totalidade ou quedar, aínda que sexa por moi pouco, fóra dela. A referencia territorial sitúase aproximadamente nunha diagonal entre Ponteceso e A Mezquita: cara ao norte producirase a totalidade, mentres que cara ao sur será parcial, aínda que moi próxima ao 100 % en numerosos puntos.

«O norte vai ter un fenómeno probablemente máis espectacular, pero, en todo caso, en toda Galicia o eclipse vai ser visible», resumiu Merelles.

Gafas homologadas e máxima precaución

A espectacularidade do acontecemento non debe facer esquecer os riscos. Unha das mensaxes nas que máis insistiu o responsable de Turismo de Galicia foi precisamente a necesidade de seguir as recomendacións oficiais e non mirar directamente ao Sol sen a protección axeitada.

«Hai que utilizar as gafas que estean homologadas, cerciorarse ben de que o material que imos utilizar é o propio para estes acontecementos e atender ben as recomendacións sanitarias», advertiu Merelles. A información de seguridade, lembrou, está difundida a través da web especial habilitada pola Xunta e doutros portais oficiais das administracións.

Na franxa de totalidade, a fase máis espectacular será breve. Segundo os datos comentados durante a entrevista, poderá oscilar aproximadamente entre os quince segundos e o minuto e medio dependendo do lugar de observación. «Haberá afortunados que poidan gozar dunha totalidade de máis dun minuto e outros que estean quince segundos, pero, en todo caso, o espectáculo está asegurado en Galicia», afirmou.

As previsións meteorolóxicas manexadas a poucas horas do eclipse tamén invitan ao optimismo. Merelles explicou que MeteoGalicia apuntaba a condicións favorables, aínda que coa posibilidade dalgúns episodios de nubes nas zonas máis setentrionais. «A previsión é que se poida observar dun xeito moi positivo este fenómeno», sinalou, lembrando en todo caso o carácter cambiante do tempo.

Merelles pide evitar desprazamentos innecesarios

Xunto coa protección ocular, a mobilidade aparece como outra das principais preocupacións ante a concentración de persoas que pode producirse en determinados puntos de observación. A recomendación de Turismo de Galicia é clara: se o eclipse pode contemplarse preto da residencia ou do lugar de vacacións, o mellor é non coller o coche.

«Se alguén vai ter o eclipse moi preto de onde reside ou de onde está pasando as súas vacacións, non é preciso que se desprace», indicou Merelles. A Xunta prevé reforzos en determinados servizos de autobús, pero insiste na necesidade de reducir os movementos innecesarios e extremar a precaución nas estradas.

O turismo mantén o pulso e medra o peso internacional

A entrevista en Radio Líder Santiago serviu tamén para facer balance da evolución turística de Galicia. Merelles mostrouse «moi satisfeito» cos resultados dos primeiros meses do ano e asegurou que a afluencia de visitantes evoluciona en niveis próximos aos de 2025, cun comportamento especialmente positivo na rendibilidade dos negocios.

Segundo explicou, «os ingresos son maiores que o ano pasado» e tamén está medrando a estancia media nos establecementos turísticos. O director apuntou ademais a un incremento aproximado do 5 % no número de peregrinos e destacou o crecente peso do mercado internacional.

«Cada vez veñen máis estranxeiros, que son os que máis gastan no noso territorio; xa temos cifras superiores ao 30 %», indicou. Para Merelles, máis alá de perseguir récords de visitantes, o dato relevante é que a actividade turística permita incrementar os ingresos das empresas e que esa riqueza reverta na economía galega.

O Xacobeo 2027 xa está «na cociña»

Co eclipse ás portas, Turismo de Galicia traballa paralelamente no seguinte gran acontecemento turístico da comunidade: o Xacobeo 2027. Merelles confirmou que os preparativos avanzan «ao 100 %», coa incorporación de Marcos Gómez Román ao Comisariado do Xacobeo e con contactos con empresas e institucións que colaborarán a través do plan de patrocinios.

A intención da Xunta é que o próximo Xacobeo transcenda Santiago de Compostela e deixe pegada no conxunto da comunidade. «Nós apostamos porque o Xacobeo se estenda a toda Galicia, pero evidentemente Santiago é o epicentro do Xacobeo e do Ano Santo compostelán», afirmou.

Merelles evitou adiantar os contidos dunha programación aínda en preparación, pero deixou clara a ambición coa que se está deseñando. «Agora mesmo poderiamos dicir que estamos na cociña, traballando para que a finais de ano se poida presentar un Xacobeo 2027 con todos os ingredientes para que sexa dos mellores Xacobeos da historia».