Inaugúrase a senda peonil e ciclista que une Ames e Santiago

Este é o último treito do eixo de mobilidade de Santiago de Compostela, que une O Milladoiro coa estación intermodal. Trátase dun traxecto de case 6 km e que desde hoxe xa se pode percorrer en bicicleta, a pé ou en vehículos de mobilidade persoal

Blas García: “Esta infraestrutura combínase á perfección coa humanización da avenida Rosalía de Castro no Milladoiro, que aposta tamén por unha mobilidade interior máis sostible, segura e accesible. Son actuacións que se complementan e forman parte dunha mesma visión: facilitar os desprazamentos a pé e en bicicleta, conectar mellor Ames con Santiago e avanzar cara a un modelo de mobilidade máis sostible”

Ames, 14 de agosto de 2026 – Esta mañá, a corporación municipal de Ames inaugurou, xunto ao presidente da Xunta, Alfonso Rueda, a senda peonil e ciclista entre O Milladoiro e Santiago de Compostela, unha opción fronte ao vehículo particular, cunha ruta integrada na paisaxe, accesible e conectada co transporte público, que contribúe así mesmo ás políticas de transición ecolóxica e de cambio climático. Á inauguración tamén asistiron o conselleiro de Presidencia, Xustiza e Deportes, Diego Calvo, e a conselleira de Vivenda e Planificación de Infraestruturas, María Martínez.

Este é o último treito do eixo de mobilidade de Santiago de Compostela, que une O Milladoiro coa estación intermodal. Trátase dun traxecto de case 6 km no que a Xunta investiu 7,5 millóns de euros, cofinanciados con fondos Next Generation, que desde hoxe xa se pode percorrer en bicicleta, a pé ou en vehículos de mobilidade persoal.

O alcalde de Ames, Blas García, sinalou que “a inauguración desta senda supón un gran paso para fomentar unha mobilidade sostible entre o Concello de Ames e o de Santiago. Esta infraestrutura combínase á perfección coa humanización da avenida Rosalía de Castro no Milladoiro, que aposta tamén por unha mobilidade interior máis sostible, segura e accesible. Son actuacións que se complementan e forman parte dunha mesma visión: facilitar os desprazamentos a pé e en bicicleta, conectar mellor Ames con Santiago e avanzar cara a un modelo de mobilidade máis sostible.”

O rexedor amesán tamén quixo deixar claro que “ambas actuacións atopáronse con oposición e debate, algo lóxico cando falamos de obras relevantes que transforman o espazo público e afectan directamente á vida das persoas, pero por riba de calquera diferenza debe primar sempre o interese xeral. As administracións públicas estamos para sumar, para colaborar e para remar na mesma dirección cando se trata de mellorar a vida da veciñanza. Podemos ter visións diferentes, pero nunca podemos permitir que os intereses políticos entorpezan actuacións que son positivas para a cidadanía. O importante é que cando unha actuación responde a unha necesidade real e contribúe a construír un ames e unha contorna máis sostible, segura e conectada as administracións debemos ser parte da solución e non do problema”.

O eixo de mobilidade sostible de Santiago de Compostela está composto por tres treitos —permite chegar tamén ao Hospital Clínico e San Caetano— e suma en total 10,3 quilómetros, cun investimento de 11,2 millóns de euros.

Dáse así resposta a unha demanda social de conexións seguras para camiñar ou circular en bicicleta. Do mesmo xeito, contribúese a reducir as emisións ao medio ambiente, tendo en conta que se calcula que percorrer en bicicleta o  treito entre O Milladoiro e a estación intermodal de Santiago de Compostela pode levar uns 20 minutos.