O Concello destina máis de 1.200.000 euros para as obras de mellora do Vero Boquete

28/10/2024-. O executivo municipal deu luz verde esta mañá á solicitude dunha subvención á Deputación da Coruña para cofinanciar a primeira fase de obras para a mellora das instalacións do Estadio Vero Boquete. A Xunta de Goberno local tamén aprobou o proxecto de reurbanización da rúa Puente La Reina, cun orzamento base de licitación de 493.294,01 euros e a adxudicación do contrato de luces de Nadal á empresa ILUMINACIONES SANTIAGUESAS SL, por un importe de 263.780 euros. Destes e outros asuntos tratados en Xunta de Goberno deron conta en rolda de prensa a voceira do Goberno municipal, Míriam Louzao, e a concelleira de Deportes, Pilar Lueiro.

Na rolda de prensa desta mañá, Pilar Lueiro anunciou o visto e prace por parte do executivo municipal para solicitar unha subvención á Deputación de A Coruña que permitirá sufragar parte das obras de execución da primeira fase do Plan Integral de rehabilitación do estadio municipal Verónica Boquete que se centrarán «na cuberta, fachada e soportais». O investimento total para esta fase será de 1.292.790,67 euros, que se financiará coa axuda de 850.000 euros por parte da Deputación e unha achega municipal de 442.790,67 euros. As obras terán unha duración de catro meses.

A concelleira de Deportes detallou que a intervención se realizará no saneamento e pintado dos elementos prefabricados da fachada, o que incluirá a limpeza con auga das superficies, a aplicación dun revestimento especial, a reconstrución das zonas fortemente danadas, e o selado das xuntas abertas entre as pezas da fachada e a estrutura portante.

Ao respecto do revestimento da cuberta, levaranse a cabo labores de eliminación dos restos de suciedade, a aplicación dun revestimento de impermeabilización líquida de cubertas e a substitución dos paneis de policarbonato. Tamén se realizarán tarefas de saneamento e pintado dos soportais.

De xeito complementario, a Xunta de Goberno tamén aprobou a «Aplicación de medidas correctoras para o Estadio Municipal Verónica Boquete de San Lázaro segundo o Estudo integral de patoloxías (Fase III)».

Pilar Lueiro reiterou o compromiso do Concello para mellorar as instalacións deportivas e dotar á cidade dos espazos que «Compostela merece» e reclamou a colaboración de todas as administracións para acadar este fin.

Reurbanización da rúa Puente La Reina

A Xunta de Goberno tamén deu luz verde ao proxecto de reurbanización da rúa Puente La Reina, cun orzamento base de licitación de 493.294,01 € e un prazo de execución previsto de 5 meses.

En concreto, Míriam Louzao explicou que se actuará na rúa de Puente la Reina, entre os tramos xa reurbanizados en 2019 da rúa de Batalla de Clavijo e da escalinata de Bispo Teodomiro. O obxectivo desta intervención é mellorar o estado actual das beirarrúas, da calzada, das bandas de aparcamento, e das árbores da vía. Así, o proxecto pretende levar a cabo un mellor dimensionamento das beirarrúas, da banda de aparcamento e da calzada, permitindo «unha doada integración da circulación do peón en toda a rúa». En total actuarase sobre unha superficie de duns 1.415 metros cadrados.

Tamén se procederá a substituír as redes de abastecemento obsoletas, separar a recollida de augas residuais e pluviais, e construír unha nova rede de telecomunicacións.

Contratos

Tamén se acordou a adxudicación do contrato mixto do alumeado de Nadal 2024 á empresa ILUMINACIONES SANTIAGUESAS SL, que presentou unha proposición económica de 263.780 euros (base impoñible de 218.000 € máis IVE do 21% de 45.780 €).

Ademais, o executivo municipal deu luz verde ao expediente que ten por obxecto a concesión por procedemento aberto de uso privativo de dominio público municipal para a instalación de contedores para a recollida de aceite de cociña usado no Concello de Santiago, cun canon mínimo da concesión de 2.686,76 euros.

O número de contedores necesarios para atender as necesidades estímase en 74 unidades, pero poderán presentarse propostas alternativas motivadas para a instalación dos contedores atendendo ás densidades de poboación e ás actividades de cada zona, cubrindo a totalidade do termo municipal. A empresa concesionaria terá un prazo de un mes para o seu despregamento tras a formalización da concesión e de 15 días para os bidóns destinados a festas e eventos populares.

Outras obras

O executivo municipal tamén aprobou a certificación final das obras de mellora da accesibilidade ao barrio de Pontepedriña, realizadas pola empresa ÁREA PROYECCIÓN, CONSTRUCCIÓN Y SERVICIOS, SLU cun orzamento de 14.196,06 euros, e das obras de rehabiliatción de firme, mellora da seguridade viarias e accesibilidade na rúa dos Camiños dos Vilares, no tramo entre a rúa Camiños da Vida e a rúa de Follas Novas, executada por FRANCISCO GÓMEZ Y CIA, S.L. cun importe total de 8.444,05 euros.

Convenios

Tamén se aprobou un convenio de colaboración co Mercado de Abastos por 10.000 euros para a promoción das vantaxes do consumo do produto local de tempada, a economía circular, a promoción de bonos para os aparcamentos e o servizo a domicilio do mercado, e outros coa Xunta de Confrarías de Semana Santa para o desenvolvemento dun programa de actividades e promoción da Semana Santa por 3.000 euros.