Pontón insta Xunta e Estado a deixar as «liortas partidistas» e poñerse a traballar na limpeza das praias galegas

 

 

 

A candidata do BNG recrimina ao PP que repita na crise dos pellets a “marea de mentiras, manipulación e incompetencia” da catástrofe do Prestige

Urxe a Rueda a explicar por que tardou case un mes en activar o plan de continxencia e por que mantén o nivel que non reclama medios do Estado

Santiago de Compostela, 8 xaneiro 2023.- A portavoz nacional e candidata á Presidencia da Xunta, Ana Pontón, emprazou esta tarde a Xunta e Goberno central a deixar atrás a “confrontación inútil e partidista” na crise dos pellets e a poñerse a traballar de maneira coordinada na limpeza das praias galegas afectadas.

Na Coruña, instou ademais a Alfonso Rueda a dar explicacións aos galegos e ás galegas de por que a Xunta tardou máis dun mes en activar o plan de continxencias contra a contaminación dende que tivo noticias da chegada de bolsas de pellets á costa galega. Así mesmo, reclamoulle que explique tamén por que activou o plan no nivel un que, segundo explicou, implica que non se demanden medios ao Estado.

Pontón fixo estas declaracións nunha visita á praia do Matadoiro, a onde acudiu esta tarde para comprobar no terreo a evolución da marea de pellets. Dende alí, reclamou tamén ao Goberno galego do PP que deixe a “manipulación” e faga público o informe encargado pola Xunta sobre o risco contaminante e para a saúde das persoas das bolas de plástico que están chegando á costa.

Xa pola mañá, a candidata do BNG recriminou a Alfonso Rueda que, na vez de ofrecer solucións, estea repetindo a “marea de mentiras, manipulación e incompetencia” que xa utilizou na catástrofe do Prestige. Censurou así que o Executivo de Rueda volva utilizar o mesmo modus operandi que durante a catástrofe do Prestige, primeiro ocultando a marea de plástico e sen actuar nin poñer medios e, agora, intentando manipular a situación a través dos medios públicos.

“Están demostrando unha vez máis a súa incompetencia para poñerse á fronte e liderar unha resposta ante un problema medioambiental tan grave como o que estamos vivindo”, afondou para referirse á “marea de indignación” que se está a incrementar no País non só pola marea de plástico que se estende polo litoral galego senón tamén pola “marea de mentiras e manipulacións que volve poñer en marcha o PP”.

A líder nacionalista dixo compartir a indignación dos galegos e as galegas ante unha situación que non se limita só ás Rías Baixas, senón que xa chega ás praias da Coruña, Ferrol e da Mariña lucense e fronte á que o Executivo de Rueda non é quen de ofrecer “unha resposta transparente, acorde co problema”.

Pontón reprochou tanto á Xunta como ao Goberno estatal que permanezan instalados no seu habitual pim-pam-pum “absolutamente inútil” para os galegos e as galegas. “Dende o BNG reclamámoslles que se poñan a traballar para que haxa os medios e os recursos necesarios para solucionar este problema”, urxiu para subliñar a continuación que “xa está ben de ver como, ante catástrofes destas características, os gobernos non estean á altura”.

Ante a gravidade da situación, a líder nacionalista volveu pedir a comparecencia de Rueda no Parlamento galego para dar explicacións sobre a crise e a súa xestión e insistiu en reclamar ao presidente en funcións “unha resposta á altura da cidadanía deste País”.

Pontón trasladou toda a solidariedade e recoñecemento do BNG aos concellos afectados “que están traballando sós”, ao sector pesqueiro e aos veciños e veciñas que están indo ás praias galegas a recoller os pellets plásticos ante a inacción de Xunta e Goberno estatal.

“Galiza merece unha presidenta e un goberno que non lle minta e que se poña á fronte cando hai problemas”, concluíu para amosar o seu convencemento de que o próximo 18F “imos derrotar nas urnas a esta marea de incompetencias e de mentiras e imos dar de novo unha lección de dignidade ante o mundo”.

Responsabilidades políticas tanto na Xunta como no Goberno estatal

Previamente, a candidata do BNG manifestábase nesta mesma liña nunha entrevista no espazo radiofónico Las Mañanas de RNE, na que amosou o seu orgullo pola resposta cidadá ante un vertido que ameaza de novo a costa galega e avanzou que hoxe mesmo a formación nacionalista rexistrou a solicitude de comparecencia urxente do presidente en funcións no Parlamento galego para dar explicacións sobre a xestión desta crise.

“Sabemos que dende o 13 de decembro, a Xunta, pero tamén o Goberno central, eran conscientes de que había este vertido e non fixeron absolutamente nada, deixando sós aos concellos sen medios”, reprochou para recalcar a continuación que o Executivo do PP está a repetir “o protocolo do Prestige: a ocultación, a incompetencia e a mentira, deixando soa á cidadanía galega”.

Por iso, Pontón sinalou como prioridade a dotación de medios e recursos por parte tanto de Xunta como de Goberno estatal para limpar as praias galegas, pero tamén considerou preciso depurar responsabilidades políticas en ámbolos dous casos ante un suceso coñecido dende hai case un mes.