Adrián Villa (PP): «O BNG só sabe dar solucións recadatorias para o aparcamento en Santiago»

 

 

 

Villa explicou que que “é vergonzoso que o goberno afirme que coa medida de zona azul na contorna do CHUS evitarán os vehículos ventosa, porque isto non é real, xa que ao non existir a obriga de rotar, sempre será máis barato deixar o coche nesas prazas, que no aparcamento da Choupana”.

O concelleiro popular subliñou que “estamos ante un goberno que non escoita, non asume responsabilidades e só pensa en recadar a costa do peto dos veciños”.

O concelleiro do Partido Popular de Santiago, Adrián Villa, denunciou hoxe, en rolda de prensa, que o goberno do BNG só sabe dar “solucións recadatorias” para o aparcamento en Santiago. O popular subliñou que, coa creación da zona ORA nas inmediacións do hospital Clínico, os nacionalistas decidiron suprimir prazas no Ensanche e as converteron en postos de estacionamento de só 15 minutos, arrancando os parquímetros que non funcionaban e que agora colocaron na nova zona de recadación, na contorna do CHUS”.

As prazas suprimidas estaban localizadas en rúas como a Rosa, República do Salvador, Virxe da Cerca e Campus Sur, tratábanse de espazos que, fóra do horario de carga e descarga, servían para que moita xente estacionase á hora de recoller nenos nos colexios ou para facer compras e recados.

Para o popular, “o motivo está claro, estas prazas do Ensanche tan só recadaban 4 horas e media, mentres que as novas na zona do CHUS e nas inmediacións de Pontepedriña, facturan 7 horas e media”.

“A toma desta decisión só ten unha explicación: recadar, algo que se ten convertido na folla de ruta do Goberno do BNG, é dicir, moito recadar e pouco xestionar. De feito, cos orzamentos para o presente ano, sabemos que o goberno nacionalista pretende ingresar máis de 3 millóns de euros en multas e, coa ORA, incluíndo as novas zonas, 2 M €”, engadiu.

Así mesmo, remarcou que “é vergonzoso que o goberno afirme que con esta medida evitarán os vehículos ventosa, porque isto non é real, xa que ao non existir a obriga de rotar, sempre será máis barato deixar o coche nestas prazas, que no aparcamento da Choupana”, algo que tamén pensan os veciños desta zona, os pacientes e os traballadores do complexo hospitalario.

Por outra banda, Adrián Villa tamén quixo denunciar outra “chapuza máis do Goberno nacionalista”, posto que, a día de hoxe, parece que esqueceron actualizar a aplicación do móbil que permite sacar o tícket, pero non permite renovar o estacionamento, polo que, os usuarios que empreguen esta aplicación a partir deste luns, ou ben terán que baixar a renovar manualmente o tícket ou serán sancionados.

“Con este exemplo queda de manifesto a chapuza que está a levar a cabo o goberno do BNG, quen tivo moita presa para instalar a nova zona ORA, deixando atrás a adaptación das aplicacións e instalando parquímetros que non funcionan e sen rectificar tal e como solicita a veciñanza”, agregou.

Cabe sinalar que, desde o Partido Popular, presentamos unha moción para a urxente revisión e arranxo destas máquinas, posto que os teclados non funcionan e non se pode ingresar correctamente a matrícula e os lectores de tarxeta non a len de forma correcta, polo que tan só é posible o pago con moeda.

Finalmente, o concelleiro popular subliñou que “estamos ante un goberno que non escoita, non asume responsabilidades e só pensa en recadar a costa do peto dos veciños”.