Recepción no Pazo de Raxoi á Premio Nobel de Física Anne L´Huillier

A alcaldesa de Santiago, Goretti Sanmartín, presidiu este xoves no Salón Vermello do Pazo de Raxoi a recepción institucional á científica francesa Anne L´Huillier, que en 2023 foi galardoada co Premio Nobel de Física.

No acto participaron distintos representantes da Corporación Municipal e asistiu tamén o físico e investigador da Universidade de Santiago (USC) Jorge Mira.

Anne L´Huillier, que é tamén profesora da Universidade de Lund en Suecia, asinou no Libro de Honra do Concello e expresou a súa satisfacción por visitar Santiago por vez primeira. Goretti Sanmartín trasladoulle o agradecemento da cidade pola súa presenza e fíxolle entrega dun regalo institucional coa obra de Rosalía de Castro.

Conferencia aberta á veciñanza

Este venres 2 Anne L´Huillier pronunciará unha conferencia dentro do programa de divulgación científica Conciencia da USC e do Consorcio de Santiago. Será ás 19.30 horas no Auditorio Abanca e a ela asistirá tamén a alcaldesa e outros representantes municipais.

A conferencia leva por título ‘O mundo dos átomos á escala de tempo do attosegundo’ e está aberta ao conxunto da veciñanza.

L’Huillier combina na súa carreira un profundo coñecemento da física atómica cunha extraordinaria capacidade para desenvolver técnicas experimentais de gran precisión. O seu traballo impulsou o progreso da óptica non lineal e da ciencia do láser. Ademais, formou varias xeracións de persoas investigadoras e desempeñou un papel destacado no fortalecemento da colaboración científica internacional.